Міура і Кіхара прапусцілі цырымонію ўзнагароджання ЧС па фігурным катанні – лекары забралі фігурыста на насілках

Сярэбраныя прызёры чэмпіянату свету 2024 года па фігурным катанні ў пары Рыку Міура і Руічы Кіхара прапусцілі цырымонію ўзнагароджання прызёраў спаборніцтваў.

Чэмпіёны свету 2023 года ў адвольнай праграме набралі 144,35 бала, што стала найлепшым вынікам сезона, але па суме двух выступленняў японская пара набрала 217,88 бала і стала другой.

Фігурысты прапусцілі цырымонію ўзнагароджання прызёраў чэмпіянату, якая прайшла адразу пасля завяршэння адвольнай праграмы.

Трэнер японскай пары Бруна Маркоттэ пракаментаваў іх адсутнасць.

«Руічы і Рыку вельмі моцна ганарацца выступам. Руічы кашляў, пачалася гіпервентыляцыя лёгкіх, упаў узровень цукру ў крыві. У яго так закружылася галава, што ён не мог утрымліваць раўнавагу. Урачы лічылі, што лепш пакласці яго на насілкі. Яны далі яму шмат вадкасці, і цяпер ён адчувае сябе лепш», – сказаў Маркоттэ.

Чэмпіёнамі свету па фігурным катанні ў парах сталі прадстаўнікі Канады Дэана Стэлата-Дудэк і Максім Дэшам. Яны набралі 221,56 бала. Бронзу, з вынікам 204,6 бала, атрымалі Марыя Паўлава і Аляксей Святчанка з Венгрыі.