10 нятопавых клубаў, якія правялі топавую трансферную кампанію ўлетку
«Астан Віла», «Аталанта», «Марсель» і іншыя.
Гэтым летам загалоўкі ўсіх трансферных навін чакана заняла Саудаўская Аравія, але акрамя яе (і нават еўрапейскіх грандаў) многія нятопавыя клубы арганізавалі шмат якасных пераходаў і таксама заслугоўваюць увагі.
Сабралі для вас дзесяць такіх калектываў.
Заўвага: паняцце «топавы»/«нятопавы» можна трактаваць па-рознаму – мы ж хутчэй прынялі да ўвагі тыя каманды, якія нячаста можна ўбачыць у плэй-оф Лігі чэмпіёнаў.
«Борнмут» падпісаў яшчэ некалькі праспектаў з Football Manager і ў цэлым прытрымліваецца сваёй стратэгіі набываць маладых футбалістаў (узрост найстарэйшых гульцоў з падпісаных летам – 24 гады).
«Бернлі» Венсана Кампані яшчэ мінулым летам скупіў палову чэмпіянату Бельгіі і пасля прайшоў усіх у чэмпіёншыпе, хутка вярнуўшыся ў эліту. Наўрад ці у гэтым сезоне ў «кларэтаў» выйдзе прайсці усіх у АПЛ, але трансферная кампанія клуба ўражвае – падпісана ўжо 12 (!) новых гульцоў, каб затрымацца з імі ў прэм'ер-лізе.
«Брайтан» Раберта Дэ Дзербі не толькі эфектыўна прадае, але і ўзмацняецца. Атрыманыя сродкі за трансферы Мак Алістэра, Санчэса і Кайседа клуб рэінвеставаў у падпісанне новых гульцоў, самы дарагі з якіх – Жааа Пэдра з «Уотфарда».
Важна адзначыць і вольных агентаў Махмуда Дауда (стратэгічна важнага гульца ў філасофіі італьянскага трэнера) і дасведчанага Джэймса Мілнера.
«Астан Віла» ўзмацнілася не гэтак масава, аднак, на першы погляд, вельмі якасна. Дыябі, Торэс, Цілеманс, Дзаньёла – усе яны не апошнія футбалісты на сёння, таму здольныя дапамагчы бірмінгемцам замацавацца ў еўракубкавай зоне (магчыма, нават у ЛЧ?) у новым сезоне.
«Вест Хэм» доўга маўчаў пасля сыходу Дэклана Райса, але за сродкі, што атрыманыя за яго трансферы ў «Арсенал», амаль выбудаваў новы цэнтр поля. Да Альварэса і Ворд-Праўза вось-вось далучыцца Махамед Кудус, які нарэшце будзе гуляць у топ-чэмпіянаце (сам футбаліст заявіў, што матч супраць «Лудагорца», у якім ён аформіў хет-трык, верагодна, стаў апошнім для яго за «Аякс»).
Топавыя трансферныя кампаніі праводзяцца не толькі ў Англіі. Хабі Алонса падняў «Баер» з зоны вылету і вывеў у Лігу Еўропы, а ўжо ўлетку атрымаў ад клуба футбалістаў, якіх хацеў, – тут і дасведчаныя Джака, Хофман і Грымальда, і маладыя і таленавітыя Баніфасе, Артур і Станішыч. Здаецца, сёлета за чэмпіёнства з «Баварыяй» будзе змагацца не толькі «Дортмунд».
Варта таксама адзначыць «Вольфсбург», галоўны хайлайт трансфернага акна якога – купля Лоўра Маера, якога вельмі моцна хацеў Ніка Ковач.
«Марсель» ладна закупіўся пад Лігу чэмпіёнаў, але нечакана вылецеў ад «Панацінаікас» у трэцім раўндзе кваліфікацыі, і будзе гуляць «толькі» у ЛЕ. Зрэшты, вяртанне дадому Ндыяя, трансферы Сара і Лодзі, падпісанне Абамеянга свабодным агентам прымушаюць з асаблівай цікавасцю назіраць за клубам ў новай кампаніі.
«Аталанта» у апошні час знаходзілася ў цені, але летам дала джазу на трансферным рынку. Зарабіўшы ажно 75 млн еўра на пераходзе Гойлунда ў «МЮ», бергамцы замянілі датчаніна навічкамі Турэ і Скамакай, якія сталі самымі дарагімі набыццямі ў клубнай гісторыі.
Атаку таксама ўзмацніў таленавіты Шарль дэ Кетэларэ, Калашынац, Бакер і Адапо – таксама дастаткова добрыя падпісанні як для стартавага складу, так і для ратацыі.
ПСВ – адзін з тых клубаў, якія ўвесь час губляюць сваіх найлепшых футбалістаў. Зімой сышоў Гакпо, летам – Сіманс, таму клуб ладна папрацаваў, каб знайсці ім, як мінімум, нядрэнныя замены.
Фота вокладкі: James Gilbert/Premier League