Больш за ўсіх у ЧБ-2022 мелі Паліцевіч і сербы «Шахцёра», максімум БАТЭ быў у 2 разы ніжэйшы, Кісляку плацілі, як «асабліваму» Пуцілу
А хтосьці гуляў за 200 рублёў.
Ужо два гады беларускі футбол жыве ва ўмовах зарплатных лімітаў, якія спачатку ўстанавілі ў АБФФ, а пазней зрабілі яшчэ больш жорсткімі ва ўрадзе Лукашэнкі. Лічбы вядомыя: не больш за 16 тысяч рублёў гульцам, якія правялі мінімум палову матчаў нацыянальнай зборнай у апошнія два гады, не больш за 8,5 тысяч рублёў - усім астатнім. Свае абмежаванні існуюць у трэнераў.
Аднак у новым годзе белфутбол можа зажыць па новых правілах. Паводле інфармацыі «Трыбуны», у АБФФ практычна вырашана пытанне аб паніжэнні столі заробкаў, прычым у шэрагу выпадкаў (трэнерам і гульцам, каторыя недастаткова дапамагаюць зборнай) выплаты могуць зменшыць практычна ўдвая. Гульцоў "нацыяналкі" ліміты закрануць не павінны.
Але гэта справа наступнага сезона. "Трыбуна" распавядае, на якія грошы жылі гульцы вышэйшай лігі сёлета.
«ШАХЦЁР»
Чатырохразовы чэмпіён Беларусі ўжо які год плаціць гульцам вялізныя па айчынных мерках аклады. І гэта нягледзячы на тое, што галоўны спонсар - "Беларуськалій" - знаходзіцца пад санкцыямі.
У 2021 годзе «Трыбуна» расказвала пра заробкі «гарнякоў», і тады клуб быў у лідэрах «вышкі».
2022-ы ў гэтым плане нічога не змяніў, хаця лічбы сталі крыху іншымі. Узімку салігорскі клуб істотна знізіў заробак некаторым гульцам. Нехта пагадзіўся на новыя ўмовы, а нехта не захацеў падціскацца. Напрыклад, Аляксандр Гутар і Ігар Стасевіч, якія да гэтага часу сядзяць без працы.
У гэтым сезоне, як і ў папярэднім, не абышлося без некаторых затрымак з выплатамі, не было і прэміяльных. Аднак заробкі ўсё роўна засталіся на вельмі прыстойным узроўні. Роскід у выплатах істотны: ад пары тысяч да 15 тысяч долараў. Лідарамі калектыву па заробках з'яўляюцца беларус Сяргей Паліцевіч, які атрымаў ад АБФФ званне найлепшага абаронцы ЧБ-2022, сербы Ігар Іванавіч (найлепшы паўабаронца «вышкі» ў сезоне, які завяршыўся) і Нікола Анціч. Гэтая тройца, паводле нашай інфармацыі, у сезоне-2022 атрымлівала якраз па 15 тысяч долараў за месяц.
Такі вялікі заробак насуперак ліміту быў магчымы праз тое, што з гульцамі былі заключаныя доўгатэрміновыя кантракты яшчэ да ўвядзення абмежаванняў у 2021 годзе, а таму дамовы неабходна было выконваць. Анціч, які ўжо заявіў аб тым, што пакіне «Шахцёр», адной з прычын рашэння назваў якраз столь заробкаў. Мяркуючы па ўсім, ісці на саступкі серб быў негатовы.
«ЭНЕРГЕТЫК-БДУ»
У красавіку 2022 года галоўны трэнер "студэнтаў", якія ў гэтым сезоне стварылі сапраўдную сенсацыю, распавядаў, за якія грошы працуюць гульцы ў камандзе:
- 150 рублёў - гэта аванс. Можа, яшчэ 200 рублёў на харчаванне, можаце іх яшчэ дадаць. Разам 600-700 рублёў - у гэтых межах мы цяпер працуем. Мы не можам плаціць грошы за маладых гульцоў, але хто жадае, прыязджайце, прасіцеся на прагляд. Але толькі фанаты футбола, хто гатовы ахвяраваць усім дзеля таго, каб пачаць гуляць.
Сам жа спецыяліст сказаў, што яго заробак - у раёне 390 рублёў. Наогул, у "Энергетыка-БДУ" адзін з самых сціплых бюджэтаў у вышэйшай лізе - 300 тысяч даляраў.
Словы Раднёнка, паводле нашай інфармацыі, блізкія да праўды, аднак на працягу сезона былі гульцы, якія ўсё ж такі атрымлівалі крыху больш за 600 рублёў. Так, лідарам па заробках з'яўляўся 23-гадовы капітан Аляксандр Свірэпа. Ён атрымліваў на месяц каля дзвюх тысяч рублёў.
Астатнія з клубнай казны атрымлівалі ў раёне 500-900 рублёў. У тым ліку найлепшы гулец ЧБ-2022 Бабір Абдзіхолікаў, які па выніках сезона ўзяў шэраг індывідуальных узнагародаў. Праўда, ёсць нюанс. Па нашай інфармацыі, апроч таго, што Бабір атрымліваў ад «Энергетыка-БДУ», яму са сваёй кішэні дапамагалі агенты. Так што ўзбек надгаладзь не жыў.
Мікалай Хадасевіч паведаміў, што па выніках сезона гульцам "срэбранага" "Энергетыка-БДУ" выдалі бонусам па дзве тысячы долараў на чалавека, аднак некаторыя крыніцы гэтыя звесткі зняпраўджваюць, а сам клуб абыграў сітуацыю пры святкаванні заканчэння сезона.
БАТЭ
Барысаўцы ўжо даўно не могуць скласці канкурэнцыю "Шахцёру" ў плане заробкаў. У многім праз тое, што клуб, якім са студзеня 2019 года кіруе Андрэй Капскі, перастаў станавіцца чэмпіёнам і трапляць у групавыя этапы еўракубкаў. Таму тых грошай, якія ўдавалася атрымліваць раней, сёння няма. Усё гэта адбіваецца і на гульцах.
Якраз праз нежаданне ісці на паніжэнне заробку ў свой час з каманды сышлі лідары Стасевіч і Ягор Філіпенка, а таксама легенда Барысава Павел Няхайчык, які ўвогуле завяршыў кар'еру. Першыя двое ў свой час атрымлівалі ў раёне 15 тысяч долараў, Няхайчык - каля 12 тысяч.
Цяпер лічбы зусім іншыя. Па нашых звестках, адным з лідараў па заробках у сезоне-2022 з'яўляўся сербскі абаронца Якаў Філіпавіч. Самы дарагі гулец цяперашняга БАТЭ (transfermarkt.world ацэньвае легіянера ў 1,20 млн еўра) неўзабаве з'едзе з каманды. Адной з прычын, як нам стала вядома, стала ў тым ліку нежаданне ісці на ўразанне заробку. У 2022 годзе Філіпавіч атрымліваў у раёне васьмі тысяч долараў на месяц. Такая ж сума падала на картку нападніку Неманні Мілічу, які ўжо з'ехаў з Барысава. Абодва заключалі з клубам кантракты да ўвядзення лімітаў.
А вось Станіслаў Драгун перападпісаў кантракт перад пачаткам сезона-2022, і сума там фігуравала значна меншая ў параўнанні з 12 тысячамі долараў, якія ён атрымліваў раней.
Найлепшы брамнік чэмпіянату Беларусі-2022 Андрэй Кудравец атрымліваў крыху менш за 2,5 тысячы долараў. Увогуле, прыкладна на такім узроўні знаходзіцца большая частка заробкаў у БАТЭ.
«ДЫНАМА» МІНСК
У сталічным клубе, якім фактычна кіруе так званы міністр спорту Сяргей Кавальчук, інфармацыю аб заробках хаваюць максімальна старанна. Аднак пра некаторыя дэталі кантрактаў лідэраў калектыву «Трыбуна» дазналася.
Як мы ўжо паведамлялі, перад сезонам-2022 паўабаронца Антон Пуціла заключыў кантракт з мінчанамі, і яго аклад перавышаў ліміт у 8,5 тысячы рублёў. Гэта стала магчымым з блаславення Кавальчука - чыноўнік ацаніў учынак футбаліста, які першым у калектыве падпісаў праўладны ліст. У выніку ў мінулым сезоне Пуціла атрымліваў каля васьмі тысяч долараў на месяц.
Такія грошы прыходзілі на картку не толькі Пуцілу. Падобным заробкам у 2022 годзе мог пахваліцца і Сяргей Кісляк. Натуральна, гэта таксама не здарылася б без ухвалы Кавальчука. Аднак тут прычына іншая - у важнасці і статусе футбаліста.
У астатнім жа гульцы «Дынама» атрымлівалі столькі, колькі можна па ліміце, а сярэдні заробак як беларусаў, так і легіянераў, вар'іраваўся ў межах двух-чатырох тысяч долараў без уліку бонусаў.
«ІСЛАЧ»
Арцём Радзькоў стварыў калектыў, які ледзь не ўскараскаўся на п'едэстал. Пры гэтым па-сапраўднаму зорных і топавых гульцоў, нават па беларускіх мерках, у "Іслачы" няма. Гэта не перашкодзіла камандзе стаць пятай, а Радзькову ўзяць званне найлепшага трэнера чэмпіянату-2022.
Цікава, што гульцы далі вынік за зусім сціплыя па сучасных мерках грошы (хоць пра такія аклады могуць толькі марыць некаторыя клубы "вышкі"). Так, адным з лідараў па заробку ў "Іслачы" ў сезоне-2022 быў ветэран клуба 31-гадовы паўабаронца Алег Патоцкі. На яго картку прыходзіла ў раёне 2,5 тысячы долараў штомесяц. Крыху менш - каля 2 тысяч долараў - атрымліваў Руслан Лісаковіч. Афрыканскія футбалісты "Іслачы" мелі 800-1000 долараў. А вось 21-гадовы абаронца Вадзім Пігас, паводле нашых звестак, гуляў за тысячу рублёў (крыху менш за 400 долараў).
«МІНСК»
Цікавая сітуацыя склалася ў "Мінску", які пад кіраўніцтвам Вадзіма Скрыпчанкі таксама здолеў пашумець у сезоне. Зімой гульцы заключалі кантракты на пэўных умовах, разлічвалі на прапісаныя заробкі, аднак вельмі доўга іх не бачылі. Аб бонусах і казаць не варта.
Пасля Новага года гульцы атрымалі па паўтара заробку, а далей была затрымка ажно на дзевяць месяцаў. Частку запазычанасці кіраўніцтву клуба ўдалося восенню пагасіць. Для разумення, у «Мінску» заробкі і так не самыя вялікія. Напрыклад, лідары калектыву Антон Шрамчанка і найлепшы футбаліст Беларусі-2022 Уладзімір Хвашчынскі атрымлівалі каля 8,5 тысяч рублёў. Або прынамсі разлічвалі на гэта па кантрактах. Ніжняя планка ў клубе была на ўзроўні 500-600 долараў - у асноўным маладым гульцам. Сярэдні ж заробак - 1-2 тысячы долараў.
Як нам стала вядома, пасля заключнага тура чэмпіянату Беларусі кіраўнік клуба Андрэй Васілевіч заходзіў у распранальню каманды, каб павіншаваць яе з заканчэннем сезона. На пытанне, ці будуць пагашаныя даўгі да канца года, як гэта было абяцана раней, функцыянер наўпрост адказаў, што разлічваць на гэта не варта. Маўляў, спонсары не знойдзеныя, заробкі плаціць няма чым, а нейкага прасвету не варта чакаць раней за студзень-люты 2023 года.
І яшчэ адзін момант, які стаў вядомы "Трыбуне". У наступным сезоне, як ужо было абвешчана ў клубе, сярэдні заробак гульцоў «Мінска» плануецца на ўзроўні дзвюх тысяч рублёў (крыху менш за 800 долараў па цяперашнім курсе). Зарплата ж галоўнага трэнера не будзе перавышаць чатырох тысяч рублёў (каля 1,5 тысячы долараў). Па нашай інфармацыі, фінансавае пытанне стала адной з прычын, чаму Сяргей Яромка адмовіўся ўзначаліць «Мінск».
«ГОМЕЛЬ»
Каманда з абласнога цэнтра ў 2022 годзе пад кіраўніцтвам Уладзіміра Нявінскага ў чэмпіянаце не паказала нічога выбітнага, затое ў маі ўзяла Кубак Беларусі дзякуючы перамозе над БАТЭ. А ўлетку вярнулася ў еўракубкі, праўда, вельмі няўдала.
Паводле інфармацыі «Трыбуны», сёлета гомельскія футбалісты мелі ў сярэднім 1500-2000 долараў. У гэтай кампаніі вылучаўся Аляксандр Макась, на картку якому без уліку бонусаў прыходзіла восем тысяч рублёў (крыху больш за тры тысячы долараў). Форвард стаў найлепшым бамбардзірам каманды ў чэмпіянаце з васьмю мячамі.
Але лідарам калектыву па заробку стаў паўабаронца Павел Сядзько, які прыйшоў у «Гомель» у ліпені. Па нашых звестках, ён атрымліваў (і меў на гэта права) каля шасці тысяч долараў. Усё гэта ўпісвалася ў ліміты, таму што на момант заключэння ўгоды гулец прыняў удзел (ці як мінімум быў заяўлены на гульню) у больш чым палове матчаў нацыянальнай зборнай за мінулыя два гады. Ды і ў 2022 годзе Сядзько працягнуў выклікацца ў зборную.
«ТАРПЕДА-БЕЛАЗ»
У камандзе Дзмітрыя Молаша ў плане заробкаў усё нашмат спакайней. Больш за тое, нейкім чынам кіраўніцтву клуба ўдалося дамовіцца наверсе, каб некаторыя гульцы атрымлівалі нават больш, чым дапушчае ліміт.
Як нам стала вядома, бразілец Ліпе Вялозу меў сёлета каля 5,5 тысяч долараў на месяц. Па сутнасці, паўабаронца і з'яўляўся самым высокааплатным гульцом каманды. Амаль не змяніліся ў параўнанні з 2021 годам аклады Андрэя Хачатурана і Аляксея Анцілеўскага, якія што тады, што зараз атрымлівалі ў раёне пяці тысяч долараў на месяц.
Наогул, паводле нашых звестак, фінансавых праблем у клубе сёлета не было, заробкі, нават максімальныя, выплачваліся своечасова. У сярэднім жа гульцы атрымлівалі па 3-4 тысячы долараў. У моладзі, натуральна, заробкі былі ніжэйшыя за гэты паказчык.
«НЁМАН»
У Гродне, на думку многіх спецыялістаў, сёлета падабраўся склад, які мог прэтэндаваць на месца куды вышэй, чым дзявятае. Але не атрымалася.
Не ўсё было гладка і з заробкамі. Да пачатку красавіка гульцы атрымалі грошы толькі за 13 дзён студзеня. Але з часам сітуацыя выправілася - даўгі ўдалося пагасіць, футбалісты пачалі атрымліваць тое, што ім належыць. Пры гэтым перавышэнняў ліміту зафіксавана не было.
Лідар “Нёмана” Павел Савіцкі меў штомесяц у раёне 3,5 тысячы долараў. Для гульца гэта быў максімум, бо ён не правёў за папярэднія два гады паловы матчаў за "нацыяналку". Ну а клуб не стаў упрошваць чыноўнікаў.
Цікава, што такія ж грошы атрымліваў гамбіец Па Амар Жабе, які з'явіўся ў камандзе ў жніўні і правёў да канца сезона толькі два матчы (усяго 60 хвілін). 23-гадовы нападнік мае кантракт з клубам да 30 чэрвеня 2024 года.
Ненаду Адамовічу і Гегаму Кадзімяну належала плаціць па тры тысячы долараў. Ну а беларусы ў сярэднім атрымлівалі 1500-2500 долараў.
А што ў астатніх клубаў?
Каманды, якія занялі месцы ў другой палове табліцы, у большасці сваёй высокімі заробкамі пахваліцца не маглі. За выключэннем парачкі клубаў. Напрыклад, у «Віцебску», які ўмудрыўся наўпрост выляцець з вышэйшай лігі, у раёне трох тысяч долараў атрымлівалі лідары калектыва – Антон Мацвеенка, Руслан Цевераў, Алег Вераціла, Арцём Скітаў і Жуліё Сезар. Ну а ў сярэднім гульцы "Віцебску" мелі паўтары тысячы долараў.
Блізкі да максімуму па ліміту аклад мелі Эдгар Аляхновіч і Міхаіл Гардзяйчук, якія вызначалі гульню брэсцкага «Дынама».
У «Белшыне», якая вярнулася ў эліту, некалькі гульцоў маглі разлічваць нават на 2,5 тысячы долараў. У тым ліку 33-гадовы абаронца Артур Слабашэвіч.
"Славія", якая ўвосені запрасіла да сябе найлепшага трэнера Беларусі-2022 Івана Біёнчыка, маладым гульцам плаціла зусім няшмат (каля 500 долараў), а вось больш дасведчаным і ўзроставым гульцам - каля 1600 долараў. Да такіх адносіліся, напрыклад, Андрэй Чухлей, Глеб Жэрдзеў, Сямён Шасцілоўскі, Яўген Барсукоў і расіянін Георгій Бугулаў.
У «Дняпры», які патрапіў у «вышку» з шостага месца ў Д2, але зноў туды абрынуўся па выніках сезона-2022, зарабіць шмат было нерэальна. Сярэдні заробак у клубе - 600-800 долараў. Больш за ўсіх - каля 1200 долараў - зараблялі галкіпер Уладзімір Жураў, а таксама палявыя гульцы Раман Волкаў, Павел Бардукоў і Павел Цэслюкевіч.
Ну а зусім аскетычная сітуацыя склалася ў "Арсенале", які ў першы свой год у вышэйшай лізе трапіў у стыкі і там прайграў "Макслайну". У дзяржынцаў столь заробкаў была на ўзроўні 900 долараў. Такія грошы мелі, напрыклад, Дзмітрый Асіпенка і Ягор Хвалько. А вось некаторыя маладыя футбалісты, як аказалася, гулялі і ўвогуле за 200 рублёў.
Фота: fcshakhter.by, fcminsk.by, energetikbgu.by, fcbate.by, dinamo-minsk.by, fcgomel.by, fcneman.by
