Раналду пайшоў у разнос: абвінаваціў «МЮ» ў здрадзе, зняважыў тэн Хага – гэта павiнна быць развiтанне з клубам

Крыштыяну Раналду спаліў усе масты з «Манчэстэр Юнайтэд» адным iнтэрв'ю. Прычым у поўным варыянце яно яшчэ не выйшла – хапiла анонса. Усе, каму было цiкава, пачулi, што яго спрабуюць вытурыць з клуба, трэнер Эрык Тэн Хаг яго не паважае, а пасля сыходу Алекса Фергюсана «МЮ» не развіваецца.

Без лішніх каментароў проста перадаем словы Крыша.

• «Я адчуваю, што мне здрадзілі праз тое, як са мной абышліся ў «Манчэстэр Юнайтэд». У клубе спрабавалі прымусіць мяне сысці – не толькі галоўны трэнер, але і іншыя людзі ўнутры клуба. Не толькі ў гэтым сезоне, але і ў мінулым. Я раздражнёны тым, што мяне зрабілі белай варонай, якую абвінавачваюць ва ўсім, што пайшло не так у клубе, і актыўна выцiскаюць.

Як сказаў [мастак Пабла] Пікаса, вы павінны знішчыць, каб аднавіць. Калі яны пачынаюць з мяне, гэта не праблема для мяне. Я люблю «Манчэстэр Юнайтэд», я люблю заўзятараў, яны заўсёды на маім баку. Але калі хочуць зрабіць усё па-іншаму, яны павінны змяніць шмат рэчаў».

• Пра былога трэнера клуба Ральфа Рангніка: «Калі ты нават не трэнер, як ты збіраешся быць босам у «Манчэстар Юнайтэд»? Я нават ніколі не чуў пра яго».

 • «Я не паважаю тэн Хага, таму што ён не праяўляе павагі да мяне. Калі вы не будзеце паважаць мяне, я ніколі не буду паважаць вас».

 • «Я не ведаю, чаму [былы футбалiст «МЮ» Уэйн] Руні так мяне крытыкуе. Магчыма, таму што ён скончыў кар'еру, а я ўсё яшчэ гуляю на высокім узроўні. Я не хачу казаць, што выглядаю лепш за яго. Але гэта праўда».

• «Я ішоў за сваім сэрцам [пры вяртанні ў Манчэстэр]. Сэр Алекс [Фергюсан] сказаў мне: «Ты не можаш перайсці ў «Манчэстэр Сіці». Я адказаў: «Добра, бос».

Прагрэс клуба нулявы. З таго часу, як сэр Алекс сышоў, я не бачу ніякіх змен. Нічога не змянілася. Не толькі джакузі, басейн або трэнажорная зала. Нават некаторыя тэхналагічныя моманты, кухня, кухары (гэта выдатныя людзі, я іх люблю) – усё гэта застыла ў часе, што мяне вельмі здзівіла.

Я думаў, што ўбачу іншыя рэчы, тэхналогіі, інфраструктуру. На жаль, мы бачым многае з таго, што я прывык бачыць у 21, 22, 23 гады. Гэта мяне вельмі здзівіла».

• «Фергюсан лепш за любога ведае, што клуб не на тым шляху, якога ён заслугоўвае. Ён ведае. Усе ведаюць. Людзі, якія гэтага не бачаць, проста не хочуць бачыць, яны сляпыя».

• «Заўзятары павінны ведаць праўду. Я хачу лепшага для клуба. Вось чаму я вярнуўся ў «Манчэстэр Юнайтэд». Але ёсць некаторыя рэчы, якія не дапамагаюць нам выйсці на больш высокі ўзровень, як «Сіці», «Ліверпуль», а цяпер нават «Арсенал». Клуб такой велічыні павінен быць вяршыняй дрэва, але, на жаль, гэта не так.

Заўзятары – самыя важныя ў футболе. Вы гуляеце для іх. Яны заўсёды на маім баку. Кожны раз, калі я выходжу на вуліцу, калі я гуляю на вуліцы, заўзятары падыходзяць да мяне. Яны цэняць тое, што я раблю для футбола. Заўзятары для мяне – гэта ўсё, вось чаму я даю гэтае інтэрв'ю. Я лічу, што гэта правільны час, каб выказацца».

Інтэрв'ю выклікала бурную рэакцыю як у экспертаў, так і ў клубе

Пасля такiх слоў запалала ў шмат каго. Хоць Пiрс Морган, журналiст, якi размаўляў з Крыштыяну, здзіўлены такой рэакцыяй. «Каманда ідзе пятай у АПЛ, адстаючы на 13 ачкоў ад лідара. Яна выступае ў плэй-оф Лігі Еўропы. З таго часу, як сышоў сэр Алекс, «Манчэстэр Юнайтэд» у стагнацыі, стаўшы пасрэдным клубам. Кожны гэта ведае. Раналду мае рацыю ў сваёй крытыцы».

На «Олд Трафард» так не лічаць. Паводле інфармацыі Sky Sports, тэн Хаг і гульцы «МЮ» расчараваныя як словамi Раналду, так і момантам выхаду тызеру (яны як раз рыхтаваліся вяртацца з Лондана пасля выязной гульні супраць «Фулхэма»). Партнёры партугальца па камандзе не разумеюць, навошта Крыш такога нагаварыў.

Былы гулец «МЮ» Гары Нэвіл раней баранiў Раналду, але не цяпер: «Тое, што ён сказаў, – абсалютная ганьба. Гэта інтэрв'ю не вельмі добрае для «Манчэстэр Юнайтэд».

Былы футбалiст «Лiверпуля» Джэймі Карагер падсумаваў: «Раналду пад кіраўніцтвам Эрыка тэн Хага: абвясціў, што хоча сысці, адмовіўся выходзіць на замену, сышоў з лавы да фінальнага свістка i пакінуў стадыён. 99% заўзятараў «Юнайтэд» будуць на баку тэн Хага. Раналду дрэнна спраўляецца з гэтым. А 1% заўзятараў, якія падтрымліваюць яго, – гэта [былыя гульцы «МЮ»] Рой Кін, Патрыс Эўра і Рыа Фердынанд».

І гэта толькі вяршкі сказанага ад аўтарытэтных людзей у англiйскiм футболе. Наўрад ці хтосьці мог уявіць, што нават пасля апошніх выбрыкаў легенда «МЮ» Раналду вырашыць развітацца з клубам вось такім чынам – а Iншага развiцця падзей папросту не бачна.