У «Дынама» адмовіліся працаваць з Вяргейчыкам, Кісляк не пагадзіўся на ўмовы лепшыя, чым у БАТЭ даюць Драгуну

На фоне актыўнасці БАТЭ мінскае «Дынама» пакуль толькі ўкочваецца ў міжсезонне. У клубе вызначыліся з новым галоўным трэнерам – ім цалкам прадказальна стаў Вадзім Скрыпчанка, які прыстойна выканаў працу ў «Мінску».

Пасля правальнага чацвёртага месца ў сезоне-2022 у клубе чакаліся перастаноўкі: на ролю генеральнага дырэктара прэтэндаваў адзін з цяперашніх босаў АБФФ Юрый Вяргейчык, аднак гэтая гісторыя не атрымала развіцця.

З ранейшымі людзьмі ў кіраўніцтве і ўсё яшчэ пад татальным кантролем так званага міністра спорту Беларусі Сяргея Кавальчука мінчане рыхтуюцца да новага года, дзе задача не зменіцца – чэмпіёнскі тытул.

Зрэшты, якая менавіта каманда будзе спрабаваць вярнуць золата ў сталіцу ўпершыню з 2004 года, пакуль невядома.

«Трыбуна» паведамляе падрабязнасці.

Вяргейчыка сапраўды планавалі адправіць у «Дынама», але людзі ў клубе не захацелі з ім працаваць

Гаворка пра персанал, з якім трэба было наладзіць супрацу намесніку старшыні АБФФ. Наравісты характар і недаверлівасць Вяргейчыка не даспадобы многім у беларускім футболе. «Дынама» - не выключэнне.

Не сакрэт, што ў «Шахцёры» Вяргейчык акумуляваў усю ўладу ў сваіх руках – ад падбору футбалістаў да пытанняў харчавання і закуп інвентара.

У «Дынама» ужо сабрана каманда менеджараў. Толькі адзінкі былі гатовыя хаця б паспрабаваць наладзіць камунікацыю з Вяргейчыкам.

Блізкія адносіны футбольнага функцыянера з Сяргеем Кавальчуком у дадзеным выпадку не дапамаглі – далейшы лёс Вяргейчыка па-ранейшаму пад пытаннем.

Андрэй Толмач працягвае працаваць у статусе генеральнага дырэктара «Дынама», а Андрэй Лаўрык - на пасадзе спартыўнага дырэктара. Менавіта Лаўрык пры дапамозе Яна Цігарава, які працуе ў селекцыйным аддзеле мінчан, будзе збіраць каманду на новы сезон.

Будаваць трэба будзе практычна з нуля, але некаторыя контуры ўжо праглядаюцца.

Пасля сезону на кантракце ў «Дынама» засталіся нямногія

Са статусных футбалістаў - толькі Антон Пуціла. У астатніх скончыліся кантракты.

Зрэшты, з кімсьці ўсё ж удалося дамовіцца – Раман Бягуноў, Душан Бакіч і Аляксандр Сачыўка застаюцца.

Час на развагу ўзялі Арцём Быкаў, Уладзіслаў Ложкін і Максім Швяцоў. Калі не складзецца з замежнымі варыянтамі, гэтыя футбалісты гатовыя застацца ў «Дынама».

Падобная сітуацыя і ў Івана Бахара. Мінчане жадаюць захаваць іграка, аднак вінгер спрабуе ўладкавацца ў Ізраілі або Венгрыі.

Сяргей Кісляк адхіліў прапанову «Дынама» па кантракце, хаця мінчане прапаноўвалі цалкам прыстойныя ўмовы па беларускім рынку – як адзначаюць нашыя крыніцы, даюць нават больш, чым атрымаў Станіслаў Драгун у БАТЭ.

А вось захаваць Дзяніса Грачыху і Арцёма Канцавога не ўдалося, хаця спробы, хай і не вельмі агрэсіўныя, рабіліся. Агент футбалістаў Віталь Ледзянёў адправіў маладых гульцоў у БАТЭ. Фактар Кірыла Альшэўскага прадвызначыў.

«Дынама» зрабіла некалькі цікавых падпісанняў, але працу на рынку вядзе акуратна і нетаропка

Як і чакалася, Уладзімір Хвашчынскі пагадзіўся ўз'яднацца з Вадзімам Скрыпчанкам у «Дынама». Для лепшага гульца краіны ў 2022-м гэта будзе ўжо чацвёртае прышэсце ў клуб. У 123 папярэдніх матчах за «бела-сініх» нападаючы забіў 30 мячоў і зрабіў 11 перадач.

Далучыцца да «Дынама» і Павел Сядзько, які выдатна перазагрузіў кар'еру ў «Гомелі» (4+2 у 17 матчах).

Яшчэ адным навічком мінчан стане Руслан Хадаркевіч – асноўны цэнтральны абаронца «Шахцёра» ў першым праз доўгі час чэмпіёнскім сезоне-2020 (замяніў Сяргея Паліцевіча, які атрымаў сур'ёзную траўму). Дзіўна, але за два наступныя чэмпіянаты Хадаркевіч згуляў толькі дзевяць матчаў.

Адна з галоўных мэт «Дынама» ў міжсезонне – пошук варатара, а яшчэ ў клубе сочаць за сітуацыяй Скавыша

І па чыста візуальных уражаннях, і па розных метрыках і паказчыках Ягор Хаткевіч не даваў дастатковай якасці ў варотах у сезоне-2022.

21-гадовы Дзяніс Шпакоўскі даў два «сухія» матчы ў канцы сезона, але відавочна, што «Дынама» мае патрэбу ў стабільным першым нумары.

Мінчане сочаць за развіццём Міхаіла Казакевіча з брэсцкага «Дынама» і Данілы Сокала са «Славіі», але гэта яшчэ юныя варатары – магчыма, босы «Дынама» звернуць увагу на кагосьці з вопытных кіпераў з беларускім пашпартам.

Максім Скавыш на кантракце з «Шахцёрам», аднак далёка не факт, што ў Салігорску змогуць выконваць ягоныя ўмовы – у такім выпадку форвард можа выбіць сабе статус вольнага агента. «Дынама», вядома, будзе зацікаўлена.