Фанат Лукашэнкі, які сеў за наркотыкі, дабіўся экстрадыцыі ў Літву: вядзе ў калоніі сацсеткі, у Беларусь ужо не хоча
Перавыхаванне экс-футбаліста ЧБ.
У жніўні 2023 года «Трыбуна» расказвала пра тое, што былы футбольны брамнік літовец Сімас Скіндэрыс, які ў свой час выступаў у чэмпіянаце Беларусі і ўжо даўно жыў у нашай краіне, трапіў у турму. Пасля падзеяў 2020-га ён хваліў Аляксандра Лукашэнку і яго палітыку, указваючы на тое, што ў беларусаў – калгасны менталітэт. Нягледзячы на лаяльнасць да рэжыму, Скіндэрыс атрымаў сем гадоў за справы, звязаныя з пастаўкай наркотыкаў у Беларусь. Усё гэта адбылося ў пачатку 2022-га.
Але з нядаўніх часоў старонка ўраджэнца Панявежыса ў Фэйсбуку ажыла: абнавілася аватарка, сталі зʼяўляцца запісы на сцяне. Няўжо Скіндэрыс выйшаў на волю?
Затрыманне літоўца па крымінальнай справе адбылося ў лютым 2022-га. Тады нашыя крыніцы паведамлялі, што ў сітуацыі замяшаныя наркотыкі. Як пазней удалося высветліць, Скіндэрыс збіраўся арганізаваць пастаўку наркатычных рэчываў у Беларусь, але яго хутка накрылі, так і не даўшы разгарнуцца. У першай палове 2022-га над былым футбалістам прахадзіў суд, дзе ўсё магло скончыцца 12 гадамі пазбаўлення волі (мяркуючы па тэрміне, абвінавачвалі Скіндэрыса па ч. 3 артыкула 328-1 КК Лукашэнкі «Незаконнае перамяшчэнне праз мяжу Еўразійскага эканамічнага звяза і (або) Рэспублікі Беларусь наркатычных сродкаў, псіхатропных рэчываў або іх прэкурсораў або аналагаў».) Літоўцу ў выніку далі сем гадоў калоніі. Па некаторай інфармацыі, тэрмін ён адбываў у Жодзіне. На волі ў яго засталіся жонка і дачка.
Доўгі час пра Скіндэрыса нічога не было чуваць. Натуральна, маўчалі і яго сацсеткі. Апошні пост быў датаваны 22 снежня 2021 года – фатаграфія з навагодняга ранішніка дачкі. Далей – запісы іншых карыстальнікаў, віншаванні з днём нараджэння. Аднак 3 лютага 2024 года старонка ў Фэйсбуку нечакана ажыла: карыстач змяніў фота профіля. Праз тыдзень здымак зноў памяняўся. Ну а далей на сцяне сталі зʼяўляцца новыя запісы: відэа таго, як дачка купаецца ў басейне, фатаграфія дачкі ў кафэ, карцінкі з філасофскімі фразамі («Сысці своечасова – гэта такая ж прыкмета добрага тону, як не спазніцца да пачатку», «Ніколі не перабольшвайце глупства ворагаў і вернасць сяброў»). А ў канцы мінулага тыдня зʼявілася фатаграфія, дзе Скіндэрыс хваліцца тым, што скінуў 25 кг. Пры гэтым для навочнасці выстаўленыя дзве фатаграфіі. Мяркуючы па ўсім, ранейшая і актуальная. На апошняй ён стаіць побач з карцінай і выглядае сапраўды добра схуднелым.
Па такой актыўнасці можна было падумаць, што экс-футбаліст ужо вызваліўся. «Трыбуна» паспрабавала з ім звязацца ў сацсетцы, аднак той не прачытаў паведамленняў. У выніку праз свае крыніцы нам удалося даведацца, што хоць літовец і стаў бліжэй да свабоды, але па-ранейшаму знаходзіцца ў зняволенні.
Пасля прысуду ў 2022-м Скіндэрыс адбываў пакаранне ў Жодзіна, аднак у 2023-м здолеў дамагчыся пераводу ў адну з папраўчых устаноў Літвы. Цяпер экс-брамнік працягвае адбываць пакаранне ў Правенішкскай калоніі. Гэта папраўчая калонія адкрытага тыпу (калонія-паселішча) недалёка ад Каўнаса. Створаная была яшчэ да Першай сусветнай вайны, насіла статус папраўча-працоўнага лагера, там адбывалі пакаранне асуджаныя па адміністрацыйных артыкулах. Зняволеныя здабывалі торф на торфараспрацоўках, што належалі Каўнаскай турме. У гады акупацыі Літвы нацысцкай Германіяй дзейнічаў Правенішкскі канцэнтрацыйны лагер, дзе ў пачатку 1941 года знаходзілася больш за 600 чалавек. Пасля вызвалення Літвы ў 1944-м лагер увайшоў у сістэму ГУЛАГ, была створаная Правенішкская калонія на 1000 чалавек. З часам побач са станцыяй Правенішкес зʼявіліся калоніі № 1, № 2, № 3, а ў лютым 2011-га ўстановы былі абʼяднаныя ў адну калонію.
І вось туды ў 2023-м перавялі Скіндэрыса. Як гавораць нашыя крыніцы, гэта стала магчымым дзякуючы таму, што былы спартсмен заставаўся грамадзянінам Літвы, хоць і меў від на жыхарства ў Беларусі.
Як патлумачылі «Трыбуне» ў юрыдычнай службе праваабарончага цэнтру «Вясна», такая працэдура называецца экстрадыцыяй. Яе прававая падстава – міжнародныя дамовы паміж краінамі. У адкрытым доступе гэтых пагадненняў няма, але вядома, што паміж Літвой і Беларуссю такое пагадненне дзейнічае. Для перадачы зняволенага краіна, куды плануецца перавод, робіць запыт ці праз МЗС, ці праз праваахоўныя структуры ў дзяржаву, дзе адбывае пакаранне чалавек. Але да пачатку працэдуры сам зняволены мусіць падаць хадайніцтва ў адпаведныя органы (у нашым выпадку Літвы) з просьбай пачаць працэдуру экстрадыцыі.
Што да ўмоваў утрымання Скіндэрыса ў Правенішкскай калоніі, то, паводле слоў нашых крыніц, яны істотна адрозніваюцца ад тых, што былі ў Беларусі. Літавец вельмі задаволены новым рэжымам адбыцця пакарання. Там зняволеным дазволеныя не толькі зносіны са сваякамі па відэасувязі, але і доступ да сацсетак. Уласна, вось адкуль абнаўленні ў Фэйсбуку Скіндэрыса.
Наколькі нам вядома, былы футбаліст зусім хутка можа выйсці на волю. Ці адбудзецца гэта, вырашыцца на паседжанні камісіі па ўмоўна-датэрміновым вызваленні, якое павінна адбыцца праз дзевяць месяцаў. Пры ідэальным раскладзе ўжо сёлета Скіндэрыс можа апынуцца ўдома. Пры гэтым, паводле нашых звестак, нават у выпадку вызвалення і зняцця ўсіх абмежаванняў па перамяшчэнні вяртацца ў Беларусі экс-варатар не мае намеру, хаця яго жонка і дачка па-ранейшаму застаюцца ў Мінску.
Пры гэтым у пачатку 2021 года, расхвальваючы рэжым Лукашэнкі, Скіндэрыс бадзёра крытыкаваў стан спраў у Літве. Яму падабалася, як у Беларусі змагаліся з каранавірусам і дапамагалі тым, хто ім захварэў (нібыта на яго Радзіме ўсё было зусім не так). Наогул, у Мінску ён адчуваў сябе лепш і больш бяспечна, чым у Літве, і гэта нягледзячы на рэпрэсіі. Асобна прыклаў экс-прэзідэнтку Літвы Далю Грыбаўскайтэ – вельмі падобна, што праз яе пол: «А калі пачала жанчына кіраваць у напрамку ўсіх гэтых меншасцяў, пачалася катастрофа. Угробяць Літву. Ды і паглядзіце, якія там кошты, што там робіцца».
Выглядае, што знаёмства з месцамі пазбаўлення волі ў Беларусі прымусіла Скіндэрыса па-новаму зірнуць на Радзіму, якая так яго не задавальняла.
