Адзін з найлепшых галкіпераў ЧБ з'ехаў у Казахстан, а там здарыліся «сямейныя справы» – і ён застаўся без працы. Вось што было насамрэч

У апошнія некалькі месяцаў з Канстанцінам Рудзянком адбываюцца дзіўныя рэчы. 33-гадовы брамнік, які быў першым нумарам «Нёмана» летась (30 матчаў, з іх палова на нуль і ўсяго 20 прапушчаных мячоў) і выклікаўся ў зборную, у студзені зʼехаў у казахстанскі «Кызыл-Жар», але прабыў там менш за месяц. З футбалістам там нібыта здарыліся «сямейныя абставіны», з-за чаго ён застаўся без працы і за мяжой, і на Радзіме. Расказваем, што адбылося насамрэч.

У пачатку 2024-га стала зразумела, што ў новым сезоне ў Гродне Рудзянка не будзе. Ігар Кавалевіч казаў, што ў галкіпера «нейкія свае планы», а футбаліст распавёў, што былі перамовы з клубам, але да кампрамісу прыйсці не ўдалося. Справа ж аказалася ў фінансах – Рудзянок і «Нёман» не дамовіліся па зарплаце. Галкіпер лічыў, што правёў выдатны сезон і заслужыў прыбаўку. Маўляў, і ў зборную выклікаўся (хоць не правёў за яе ні хвіліны), і ў Лізе канферэнцый дапамог прайсці некалькі раўндаў, і ў ЧБ з ім узялі срэбра. Клуб хоць і прызнаваў заслугі спартсмена, але на павышэнне не згаджаўся – максімум даваў 5250 рублёў да выліку падаткаў плюс бонусы. Рудзянок жа хацеў стаўку «зборніка», а гэта ў тры разы больш. У выніку футбаліст вольным агентам сышоў з «Нёмана» і ў канцы студзеня абʼявіўся ў «Кызыл-Жары». 11 лютага з казахстанскім клубам быў падпісаны кантракт, які задавальняў запыты беларуса, да канца 2024-га.

Пра гэта «Кызыл-Жар» абвясціў у сябе ў тэлеграм-канале. Цікава, што сёння тое паведамленне адшукаць у канале ўжо немагчыма, як і навіну пра тое, што Рудзянок пакінуў каманду (пошук там па прозвішчы ўвогуле не прыносіць ніякіх вынікаў, быццам і не было ў калектыве такога футбаліста). Галоўны трэнер «Кызыл-Жара» Алі Аліеў пра сыход легіянера распавёў казахстанскім медыя 4 сакавіка, спаслаўшыся на праблемы футбаліста з сямʼёй.

– Прапала канцэнтрацыя, і ён адчуў, што псіхалагічна не гатовы гуляць. Рудзянок прыйшоў і адкрыта ўсё распавёў, за гэта яму дзякуй, – апісваў расстанне спецыяліст. Гэтага каментара таксама няма ў сацсетках клуба.

Больш пра брамніка ў «Кызыл-Жары» не ўспаміналі, а сам Рудзянок нічога не расказвае пра свой сыход. Тым не менш «Трыбуне» ўдалося даведацца некаторыя дэталі сітуацыі. Сямейныя абставіны ў ёй адыгралі далёка не галоўную ролю, калі ўвогуле прысутнічалі (прынамсі, нам пра гэта нічога не вядома).

Рудзянок далучыўся да «Кызыл-Жара» у канцы студзеня і ўжо пасля некалькіх дзён сумеснай працы патрапіў у стартавы склад на таварыскі матч з гданьскай «Лехіяй». 30 студзеня прадстаўнік Д2 Польшчы атрымаў перамогу 1:0.

Праз шэсць дзён Рудзянок ізноў згуляў, а «Кызыл-Жар» буйна саступіў «Ахмату» з расійскай прэмʼер-лігі 0:4. За пераможным спарынгам з «Акронам» з Д2 Расіі (2:1) 9 лютага легіянер ужо назіраў з боку.

Ну а неўзабаве казахстанская каманда паўдзельнічала ў таварыскім турніры ў Турцыі «Кубак ФНЛ». «Кызыл-Жар» трапіў у групу 1 з расійскімі калектывамі «Радзіма» (Д2) і «Амкал» («Медыяліга»). Спачатку каманда Рудзянка, дзе капітанам іншы беларус Яўген Бярозкін, абгуляў «Радзіму» 3:1, а затым пасля нулёў у асноўны час па пенальці адолеў «Амкал» (5:4). «Кызыл-Жар», паводле рэгламенту, выйшаў у фінал, а там ужо аказаўся мацнейшым за прадстаўніка «Медыялігі» Broke Boys (2:0). На турніры Рудзянок правёў толькі матч з «Радзімай», у астатніх гуляў 32-гадовы казахстанец Джурахон Бабаханаў.

1 сакавіка «Кызыл-Жар» вывесіў у сацсетках заяўку на сезон – Рудзянка ў ёй не аказалася. У каментарах пад пастом адзін з карыстальнікаў пацікавіўся, куды знік галкіпер. Яму адказалі, што сышоў вольным агентам. Замест Рудзянка ў заяўцы зʼявіўся казахстанец Вадзім Пятроў.

Па звестках інфармаваных крыніц, з якімі паразмаўляла «Трыбуна», у Рудзянка адразу ў клубе не пайшло. Казахстанцы некаторыя моманты ў яго паводзінах палічылі праявай зорнасці. Брамнік мог сказаць, што яго няправільна трэнуюць, ці нагадаць, што ён зʼяўляецца гульцом зборнай і сам добра ведае, дзе і над чым яму трэба працаваць. Тым не менш прыбіраць Рудзянка не сталі і нават прапанавалі кантракт, бо вельмі быў патрэбны трэці галкіпер на сезон.

Аднак гульня ў спарынгах таксама не задаволіла трэнерскі штаб, таму Рудзянку сталі шукаць замену і адшукалі яе ў асобе Пятрова. Пасля гэтага кіраўніцтва і беларускі легіянер правялі перамовы і дамовіліся скасаваць кантракт. Што да сямейных абставін, якія згадваў галоўны трэнер, то, на думку нашых суразмоўцаў, «гэта было сказана хутчэй для прыстойнасці, каб абысціся без лішніх тлумачэнняў, чаму кантракт быў падпісаны 11 лютага і скасаваны ўжо праз пару тыдняў».

Пасля вяртання з Казахстана брамнік хацеў уладкавацца назад у «Нёман» на ўмовах клуба, аднак там адказалі адмовай. Да таго моманту заяўка на сезон ужо была запоўненая – сёння гродзенцы ў варотах разлічваюць на 22-гадовага Артура Маліеўскага, 24-гадовага Максіма Бялова і 21-гадовага Кірыла Вейдыгера. Ну а Рудзянок пакуль нідзе так і не ўладкаваўся, хаця чэмпіянат у Беларусі ўжо стартаваў.