Гульцы «Дняпра» не здзівілiся, бо брамнік Жураў забухаў не ўпершыню. Трэнеру, які пра гэта распавёў, пагражала звальненне
Парушальнік рэжыму сышоў і не папрасіў прабачэння, хаця некаторыя дэталі гісторыі – прыдуманыя.
Не так даўно «Трыбуна» расказвала пра былога пракурора Сяргея Капытава, які стаў старшынёй магілёўскага «Дняпра».
А на днях футбольны менеджар перажыў першы кіраўнічы крызіс на новай гаспадарцы. Трэнер клуба Сяргей Кузьмініч распавёў на публіку пра тое, як галкіпер «Дняпра» Уладзімір Жураў сышоў у запой. Капытаву прыйшлося рэагаваць на сітуацыю, якая атрымала вялікі рэзананс у медыя. У выніку разбіраўся і з футбалістам, і з трэнерам, які ледзьве не быў звольнены.
"Трыбуна" даведалася, як гэта адбывалася.
Як усё стала вядома і якой была рэакцыя кіраўніцтва
Як сцвярджае football.by, дзе і выйшла рэзананснае інтэрв“ю, Кузьмініч сам выйшаў з журналістамі на сувязь, каб расказаць, як «варатар Жураў забухаў». Сітуацыю трэнер агалошваў, каб брамнiк «панёс за гэтае пакаранне». Па словах Кузьмініча, кіпер прапусціў два дні трэніровак (пятніцу і суботу), уключна з заняткам напярэдадні найважнейшай сустрэчы з «Макслайнам». На гульню Жураў таксама не паехаў, а магіляўчане ў выніку прайгралі 2:5, хаця да сёмай хвіліны вялі ў два мячы. Вароты ў мінулую нядзелю абараняў 20-гадовы Андрэй Ігнатовіч, у запасе знаходзіўся ягоны равеснік Мікіта Сяднёў.
Пры гэтым, па словах Кузьмініча, да пятніцы з Журавым усё было нармальна, ды і ў чэмпіянаце ён быў першым нумарам - правёў дзевяць сустрэч (сем прапушчаных мячоў, тры «сухары»). Па сцвярджэнні трэнера, яго калегі знайшлі брамніка, калі той спаў п'яным на стале ў адным з кафэ. Далейшы лёс Журава, на думку спецыяліста, - «стаяць каля крамы».
Увогуле, інтэрв'ю атрымалася рэзанансным. І, паводле інфармацыі «Трыбуны», пацягнула наступствы не толькі для брамніка, але і для самога Кузьмініча. Трэнер пра сваё жаданне расказаць усё, як ёсць, наконт Журава нікога не папярэджваў - ні галоўнага трэнера Вячаслава Герашчанку, ні іншых калег у штабе, ні прэс-службу. Усё - выключна па ўласнай ініцыятыве. Раніцай 29 чэрвеня інтэрв'ю было апублікавана.
Па нашых даных, практычна адразу пасля публікацыі старшыні Капытаву патэлефанавалі і паведамілі пра выступ Кузьмініча. Старшыня клуба пра падрыхтоўку "інфармацыйнай бомбы" таксама не ведаў. Прачытаўшы матэрыял, экс-пракурор прыйшоў у шаленства і адправіўся на стадыён "Спартак", дзе каманда праводзіла ранішнюю трэніроўку. Капытоў адразу накіраваўся да трэнерскага штаба. Па словах відавочцаў, кіраўнік зладзіў жорсткі разнос, прычым дасталася не толькі Кузьмінічу, але і Герашчанку - за тое, што дапусціў свавольства з боку памочніка. Зрэшты, гнеў у дачыненні да галоўнага трэнера хутка сышоў на нішто, а вось Кузьмінічу кіраўнік пагражаў і пазбаўленнем прэміі, і звальненнем. Выратаваў спецыяліста Герашчанка - актыўна заступаўся за памочніка, запэўніваў, што няма неабходнасці прымяняць максімальна жорсткія меры.
Галоўныя прэтэнзіі Капытава звязаныя з тым, што трэнер дазволіў сабе вынесці смецце з хаты, прычым у такой жорсткай манеры. Пра правіну Журава ў клубе ведалі, але ніхто не думаў, што гэта будзе перададзена публіцы ва ўсіх дэталях.
Эмацыйны дыялог на полі "Спартака" доўжыўся каля 10 хвілін, але ў выніку Капытаў прыслухаўся да Герашчанкі. Нашыя крыніцы адзначаюць, што для цяперашняга кіраўніка слова галоўнага трэнера сапраўды шмат значыць. Заняўшы пасаду, былы сілавік адразу абазначыў, што ў працу трэнераў лезці не мае намеру. Таму прысутнічае поўны давер да штабу - і ў плане выбару памочнікаў, і ў плане запрашэння гульцоў. Вось і ў цяперашняй сітуацыі Капытаў не стаў ісці супраць Герашчанкі па футбольным пытанні: калі трэнеру патрэбны Кузьмініч, значыць, звальняць яго не будуць.
Аднак на гэтым гісторыя не скончылася. Пасля абеду Кузьмініч паехаў у офіс клуба. Там, як нам удалося даведацца, зноў адбылася размова на павышаных танах, але да звальнення не дайшло. Трэнер толькі напісаў тлумачальную.
Як лічаць нашыя суразмоўцы, якія валодаюць сітуацыяй, Кузьмініча наўрад ці прыбяруць пасярэдзіне сезона, тым больш калі перад камандай стаіць задача вярнуцца ў вышэйшую лігу. Да пытання далейшай супрацы з трэнерам, хутчэй за ўсё, вернуцца ўжо пасля чэмпіянату. Але крыніцы адзначаюць, што Кузьмініч страціў аўтарытэт як у вачах кіраўніцтва, так і ў вачах каманды - футбалісты будуць максімальна насцярожана ставіцца да трэнера, які здольны расказаць староннім пра ўнутраныя справы.
А што ў Журава? Гэта не першы ягоны скандал на глебе алкаголю
Як мы даведаліся, напярэдадні сустрэчы з «Макслайнам» Жураў сапраўды не выходзіў на сувязь - да яго не маглі датэлефанавацца ні трэнеры, ні аднаклубнікі. У нядзелю абанент таксама нікому не адказваў. У панядзелак трэнеры паехалі на кватэру да галкіпера ў надзеі яго там адшукаць - і зноў няўдала. А потым патэлефанаваў адзін з жыхароў Магілёва, які водзіць знаёмства з прадстаўнікамі трэнерскага штаба «Дняпра». Гэты чалавек і расказаў, што днямі бачыў Журава п'яным у адным з кафэ. Нашыя крыніцы абвяргаюць інфармацыю, што трэнеры самі знайшлі футбаліста ва ўстанове. Як і словы Кузьмініча пра тое, што начальнік каманды ўсё ж такі перад гульнёй з «Макслайнам» звязаўся з брамнікам і быў пасланы ў нецэнзурнай форме.
Першая сустрэча галкіпера, трэнераў і гульцоў адбылася толькі ў сераду. Яшчэ да таго, у аўторак, Жураў з'ездзіў у офіс "Дняпра" і сам напісаў заяву на звальненне. Капытаў яе прыняў. Пры гэтым палічыў за лепшае растацца з брамнікам па дамове бакоў, а не па артыкуле за парушэнне рэжыму. Як кажуць нашыя суразмоўцы, Капытаў сапраўды прытрымліваецца пазіцыі, што нават калі нешта здарылася, з людзьмі трэба раставацца па-добраму.
Дык вось, Жураў напісаў заяву, на трэніроўкі ўжо не паехаў, а з'явіўся ў калектыве толькі ў сераду - на камандным абедзе. Па факце ён яшчэ заставаўся чальцом каманды, таму што днём звальнення ў заяве было пазначана 30 чэрвеня. На клубнай базе падчас абеду ў Журава адбыўся, мякка кажучы, эмацыйны дыялог з трэнерамі. Кузьмініча на абедзе не было, але ў ягоны адрас Жураў нагаварыў шмат чаго непрыемнага. Трэнеру потым гэта перадалі. Як лічаць сведкі тых падзей, гэта, хутчэй за ўсё, так раззлавала Кузьмініча, што ён і захацеў пра ўсё расказаць СМІ.
Што да Журава, то ён, па словах нашых суразмоўцаў, асабліва не перажываў праз звальненне і праз тое, што падвёў каманду. На твары галкіпера можна было заўважыць усмешку - ён да скандалу паставіўся з іроніяй і быццам не лічыў сябе ў нечым вінаватым. Прынамсі прабачэнняў з ягонага боку ніхто не пачуў.
Каманда ўсю гэтую гісторыю ўспрыняла больш-менш спакойна, бо добра ведала пра схільнасць Журава да выпіўкі. Па словах нашых суразмоўцаў з футбола, праблемы з алкаголем у спартсмена звярталі на сябе ўвагу і ў іншых камандах, дзе да яго ўжываліся розныя санкцыі.
Да «Дняпра» Жураў у чарговы раз далучыўся ў студзені 2020-га (раней выступаў за каманду ў 2008-2011 і 2014-2015 гадах). За апошнія тры з паловай гады правёў за калектыў ва ўсіх турнірах больш за 50 матчаў, але запомніцца не сваёй гульнёй. Па аповедах нашых крыніц, яшчэ ў 2022 годзе Жураў патрапіў у скандал з п'янкай, але тая сітуацыя не атрымала агалоскі.
А адбылося вось што. У ліпені 2022-га "Дняпро" яшчэ гуляў у вышэйшай лізе і рыхтаваўся да матчу з "Арсеналам". Але за тыдзень да выязной гульні Жураў у літаральным сэнсе знік - да яго ніхто не мог датэлефанавацца ні з клуба, ні з блізкага кола. Не аб'явіўся галкіпер ні напярэдадні сустрэчы, ні ў дзень матча. У выніку з «Арсеналам» гуляў Уладзімір Пяцігорац, а на лаўцы сядзеў Мікіта Сяднёў. «Дняпро» прайграў 0:1, адсутнасць асноўнага галкіпера трэнеры ніяк не каментавалі.
Толькі калі калектыў вярнуўся ў Магілёў, Жураў аб'явіўся - аказалася, ён сарваўся ў тыднёвы запой. Натуральна, без пакарання футбаліст не застаўся - быў пазбаўлены часткі заробку, аднак застаўся ў клубе.
Цяпер з Журавым усё ж развіталіся, але, паводле нашай інфармацыі, той моцна не пераймаецца. Так, 32-гадовы варатар разумее, што з такой рэпутацыяй у прафесійным футболе яму наўрад ці знойдзецца месца, але, як аказалася, ён ужо і сам задумваўся пра заканчэнне кар'еры. Наколькі нам вядома, Жураў мае намер пераехаць у Маскву, дзе жыве ягоная маці.
Фота: fc-dnepr.by
