«Мiнск» выйграў 27:0 – і ў лiдара зараз 50+ мячоў у сезоне! Праўда, гэта жаночы ЧБ, а забівала губляецца з галоўным супернікам
Зрэшты, ёсць шанц з'ехаць у больш крутую лігу.
Жаночы чэмпіянат Беларусі набліжаецца да свайго фінішу – на мінулых выхадных дзяўчаты правялі матчы 28-га тура з 33 усяго. Тут чэмпіёнам напэўна ў чарговы раз стане «Дынама-БДУФК», якое не ўпусціла ніводнага тытула з моманту стварэння ў 2020-м. Цяпер каманда выйграла 24 матчы з 24 з розніцай мячоў 177:1.
Толькі з лідарам губляе ачкі віцэ-чэмпіён апошніх гадоў жаночы «Мінск», які цяпер адзначыўся асобна – двухзначным лікам у турніры нікога не здзівіш, але падапечныя Андрэя Пышніка вынеслі на выездзе «Гомель» ажно 27:0.
Сем галоў у матчы на свой рахунак запісала 20-гадовая Мелана Сураўцава, якая ўмацавала сваё лідарства ў гонцы бамбардзіраў. Цяпер у яе цэлых 53 забітых мяча ў 23 матчах ЧБ-2023 – у бліжэйшай праследавацелькi толькі 22 (так, дынамаўкі забіваюць больш раўнамерна). Пры гэтым Сураўцава не біла пенальці, а 47 са сваіх галоў правяла ў другіх таймах.
Бамбардзірскі рэкорд жаночага ЧБ з сезона-2012 трымае за сабой нігерыйка Джуліяна Абі – яна за «Мінск» забіла 74 мячы ў 26 матчах. Каб дагнаць, Сураўцавай трэба за пяць астатніх матчаў забіць 22 разы. Зрэшты, будзе складана – наперадзе сустрэча з «Дынама-БДУФК», а потым тры з чатырох гульняў будуць з камандамі з самай надзейнай абаронай у турніры пасля самога «Мінска».
Тыя, хто мае ўяўленне пра жаночы футбол, разумеюць, што бамбардзіры жаночага ЧБ «набіваюць» статыстыку з адкрыта слабымі камандамі. Толькі ў адной чэрвеньскай гульні з аўтсайдарам «ДЮСШ ПалесДУ» Сураўцава аформіла 11 галоў. А вось у матчах сярод бягучага топ-5 (з 11 клубаў усяго) «гараджанка» сумарна забіла 14 мячоў – 26% ад агульнай колькасці. Ну а супраць дынамавак, гэта значыць у самых складаных матчах, дзе трэба паказваць усё найлепшае, у Сураўцавай увогуле не атрымліваецца. Дзяўчына ўжо 16 разоў гуляла супраць «Дынама-БДУФК» – і забіла ўсяго адзін мяч, які прыйшоўся на матч першага круга-2022 і ўжо нічога не вырашаў (адзнака 3:57).
Перамогу з лікам 27:0 над «Гомелем» на афіцыйным сайце «Мінска» назвалі «абсалютным рэкордам у Жаночай лізе». Мабыць, клуб пагуляў тэрмінамі і меў на ўвазе толькі адрэзак ЧБ пасля рэбрэндынгу, які адбыўся некалькі гадоў таму. За ўсю гісторыю чэмпіянатаў самы вялікі лік зафіксаваны ў чэрвені 2013-га, калі «Надзея-Дняпро» у Брэсце разграміла мясцовую «Вікторыю-86» з лікам 34:0. Адзначым, што гаспадыні гулялі ў няпоўным складзе, выпусціўшы з першых хвілін толькі восем футбалістак. Праз два тыдні брастчанкі зноў жа ў добраахвотнай меншасці атрымалі гасцявыя 0:32 ад «Зоркі-БДУ».
Якія перспектывы перад Сураўцавай можа адкрыць бамбардзірскі трафей? У мінулым сезоне найлепшай забівалай ЧБ з 35 мячамі стала тады яшчэ 18-гадовая Настасся Пабягайла. На матчы з топ-5 прыйшлося дзевяць дакладных удараў футбалісткі «Мінска» – 25% ад усіх галоў. Мінулай зiмою дзяўчына з'ехала ў «Фартуну» з чэмпіянату Даніі, дзе ў сезоне-2022/23 найлепшы бамбардзір турніру аформіла толькі 14 мячоў – асяроддзе значна больш канкурэнтнае, чым у Беларусі. Спачатку Пабегайла гуляла рэдка і ўнесла мінімальны ўклад у бронзавыя медалі клуба ў чэмпіянаце Даніі. Але ў новым сезоне футбалістка стала асноўнай – і за пяць сустрэч аформіла два з шасці ўсяго мячоў клуба. Апошні на сёння атрымаўся вельмі прыгожым.
