Крывушэнка будзе не проста галоўным трэнерам, Радзькоў у апале чынуш, Япрынцаў «заглух». Што цяпер адбываецца ў БАТЭ

БАТЭ перажывае насычаны снежань: нявызначанасць па складзе, новы генеральны дырэктар і новы галоўны трэнер, якім ізноў стаў Ігар Крывушэнка. Ці былі ў яго канкурэнты, якую ролю спецыяліст будзе выконваць у клубе і на што ў сезоне-2024 нацэльваецца БАТЭ – «Трыбуна» раскрывае некаторыя факты з барысаўскага закулісся.

Крывушэнка стане не проста галоўным трэнерам, Радзькоў не даспадобы чынушам

Яшчэ пару тыдняў таму зʼявілася інфармацыя, што Уладзімір Нявінскі можа змяніць Кірыла Альшэўскага на пасадзе галоўнага трэнера БАТЭ. А верагоднасць сыходу апошняга ацэньвалася вельмі высока. Па нашых звестках, ужо тады ў клубе Альшэўскаму далі зразумець, што кантракт з ім працягваць не будуць. На той момант ужо вяліся пошукі зменшчыка. Вось толькі ставіць на Нявінскага, які вярнуўся ў Барысаў у верасні пасля не надта ўдалага этапу самастойнай працы ў «Гомелі» і стаў дапамагаць Альшэўскаму, кіраўнікі БАТЭ не спяшаліся. Пачалі зʼяўляцца прозвішчы іншых магчымых галоўных трэнераў для каманды. Гэта і Ігар Крывушэнка, і Арцём Радзькоў – абодва добра вядомыя барысаўскім заўзятарам. Першы ўжо ўзначальваў каманду, другі выступаў у ёй з 2002-га па 2013-ы з невялікімі адлучкамі, а восенню 2020-га пару месяцаў уваходзіў у трэнерскі штаб Аляксандра Лісоўскага.

Вось толькі паводле нашай інфармацыі чарговае вяртанне Радзькова ў Барысаў было практычна выключанай. І справа не ў кіданнях кіраўніцтва БАТЭ. Проста найлепшы трэнер чэмпіянату-2022 пасля сыходу з «Іслачы» патрапіў у няласку лукашэнкаўскіх чынуш, якія адказваюць за спорт. Па нейкіх прычынах яны не дазваляюць спецыялісту працаваць у беларускім футболе. Гэтым, як сцвярджаюць нашыя крыніцы, шмат у чым і тлумачыцца тое, што Радзькоў ужо год знаходзіцца без працы.

Увогуле, БАТЭ проста не дазволілі б заключыць кантракт з гэтым трэнерам. Таму Крывушэнка быў для кіраўніцтва клуба, па вялікім рахунку, асноўным варыянтам. Яго прозвішча ў офісе загучала не выпадкова. Спартыўным дырэктарам БАТЭ на сёння зʼяўляецца Міхаіл Хлус, а ён з Крывушэнкам знаёмы вельмі даўно – дапамагаў таму, напрыклад, трэнаваць БАТЭ ў сярэдзіне 2000-х. Перасякаліся спецыялісты ў сярэдзіне 2010-х у «Тарпеда-БелАЗ», дзе Крывушэнка быў галоўным трэнерам, а Хлус – генеральным дырэктарам. Паводле нашай інфармацыі, не апошнюю ролю ў вяртанні Крывушэнкі ў БАТЭ адыграў менавіта спартыўны дырэктар барысаўцаў.

Кіраўніцтва клуба і трэнер хутка паразумеліся. Прадметныя перамовы, паводле нашай інфармацыі, адбыліся 27 снежня.

Пры гэтым канструкцыя ў камандзе будзе не самай звычайнай. 59-гадовы Крывушэнка сапраўды будзе галоўным трэнерам, але не ў класічным разуменні. Паводле нашай інфармацыі, у БАТЭ ён будзе больш выконваць функцыі менеджара, а адказным за трэнавальны працэс стане 50-гадовы Уладзімір Нявінскі, які таксама мае катэгорыю Pro.

Падобная схема ўжо шмат гадоў выкарыстоўваецца ў «Энергетыку-БДУ», дзе ідэйны натхняльнік праекту Анатоль Юрэвіч стаіць над усімі трэнерамі, сочыць за іх працай, нешта падказвае і раіць, але непасрэдна заняткамі руляць іншыя спецыялісты.

Стаўка – на маладых і сваіх, задачы – прыземленыя

Кардынальных перамен трэба чакаць і ў складзе каманды. Некаторыя футбалісты, як вядома, ужо пакінулі БАТЭ: капітан Валерый Бачароў перабраўся ва «Урал», брамнік Андрэй Кудравец мае кантракт з маскоўскім «Дынама». Шукаюць новыя клубы Даніла Нячаеў і Дзяніс Лапцеў – у абодвух заканчваюцца кантракты, утрымаць гульцоў пасля нядрэннага сезона павышэннем зарплаты клуб не можа.

БАТЭ ўжо паведаміў пра сыход Дзмітрыя Анцілеўскага. Па нашай інфармацыі клуб рабіў прапанову форварду, якога заўзятары прызналі найлепшым гульцом сезона, - быў гатовы плаціць шэсць тысяч долараў на месяц, то-бок максімум па лімітах для прадстаўніка зборнай. Аднак Анцілеўскі адхіліў прапанову. Наколькі нам вядома, ён мае прывабны варыянт ад аднаго з прызёраў мінулага чэмпіянату, а таксама ў яго ёсць замежная цікавасць.

Не факт, што БАТЭ зможа захаваць нават тых, хто мае дзейныя кантракты на наступны год. Размова ў першую чаргу пра паўабаронцаў Дзяніса Грачыху і Арцёма Канцавога. У пагадненнях футбалістаў прапісаныя адступныя. І калі знойдуцца клубы, гатовыя на выкуп, у БАТЭ могуць узнікнуць праблемы. Пра якія лічбы ідзе гаворка, невядома, але, як кажуць нашыя крыніцы, яны ў разы меншыя за тыя, што фігуруюць на сайце «Трансфермаркт» у якасці віртуальнага кошту (24-гадовы Канцавы і 24-гадовы Грэчка ацэньваюцца аднолькава – у 600 тысяч еўра).

Актыўнічаць на трансферным рынку сёлетняй зімой БАТЭ амаль напэўна не будзе. У Барысаве вырашылі ў сезоне-2024 рабіць стаўку на маладых, у тым ліку на сваіх выхаванцаў. Пры гэтым той жа Уладзіслаў Мялько – выхаванец акадэміі БАТЭ, які ў мінулым сезоне на правах арэнды выступаў за «Тарпеда-БелАЗ» – хутчэй за ўсё, у Барысаў не вернецца. Паводле нашай інфармацыі, жодзінцы зацікаўлены ў паўнацэнным кантракце з 19-гадовым абаронцам.

Тым не менш у Крывушэнкі і кампаніі будзе выбар пры фармаванні складу. Плюс не варта забываць, што ў распараджэнні трэнера будуць і дасведчаныя выканаўцы. Напрыклад, 30-гадовы абаронца Руслан Хадаркевіч прыйшоў летам у БАТЭ і заключыў пагадненне да канца 2024-га. Магчыма, удасца запрасіць кагосьці яшчэ. А вось што да 34-гадовага галкіпера Аляксандра Гутара, якому дазволілі зноў стаць часткай беларускага футбола пасля публічнага «пакаяння», то ён, паводле нашай інфармацыі, можа пакінуць БАТЭ.

Новыя рэаліі – стаўка на маладых, якім дапамагае пара ўзроставых гульцоў, – паўплываюць на задачы калектыву. Пакуль афіцыйна ніякіх мэт на сезон-2024 ніхто не ставіў, але абноўлены і значна амалоджаны БАТЭ, як гавораць нашыя крыніцы, будзе здольны змагацца максімум за месцы ў верхняй частцы табліцы, за медалі – пры самым ідэальным раскладзе.

Па фінансах пытанні, Япрынцаў «заглох»

2023-і ў фінансавым плане для БАТЭ быў вельмі цяжкім. Так званы міністр спорту Сяргей Кавальчук не падпісаў план развіцця, таму на дапамогу з рэжымнага бюджэту клуб разлічваць не мог – выжываў за кошт ашчаджэнняў, а таксама на грошы з продажу гульцоў. Здараліся затрымкі заробкаў, кіраўнікі змушаныя былі скарачаць аклады гульцоў і звяртацца да іншых метадаў эканоміі.

Што будзе ў новым годзе, сказаць пакуль цяжка. Безумоўна, у БАТЭ спадзяюцца, што ў 2024-м Кавальчук усё ж падпіша план развіцця. Без яго, як кажуць нашыя крыніцы, клуб рызыкуе проста не выжыць ці сутыкнуцца з катастрафічнымі фінансавымі цяжкасцямі. Няяснасць па фінансах і жаданне скараціць зарплатную ведамасць – адзін з аргументаў для клуба рабіць стаўку на маладых.

Таксама ў БАТЭ падыходзяць да канца кантракты з тытульнымі спонсарамі: букмекерскай кампаніяй FonBet, аўтамабільным заводам «Джылі» і гандлёвай сеткай «Еўраопт». Зрэшты, як гавораць нашыя крыніцы, узімку, хутчэй за ўсё, з усімі імі будуць заключаны новыя пагадненні.

Ну і момант, які ўжо не першы тыдзень абмяркоўваюць у барысаўскіх футбольных колах. Па нашай інфармацыі, ужо гэтай зімой частка акцый БАТЭ можа перайсці пад кантроль лукашэнкаўскіх улад па Барысаве. Якая менавіта частка, невядома, тым не менш чыноўнікі ў такім разе змогуць уплываць на жыццё ФК. Аднак такі сцэнар на сёння – толькі гіпатэтычны. Што да магчымага прыходу Уладзіміра Япрынцава ў кіраўнікі БАТЭ, пра што неаднаразова гаварылася ў сезоне-2023 (ды і сам былы саўласнік мінскага «Дынама» такой магчымасці не выключаў), нашыя суразмоўцы адзначаюць, што пакуль гэтая тэма заглухла.

Фота: fcbate.by