Алонса зблытаў карты грандам – і не сыходзіць з «Баера». План «Б» «Ліверпуля» ў Партугаліі, у «Баварыі» – перапалох
Круты паварот у сазе іспанскага трэнера.
Шматсюжэтная гісторыя з палявання топ-каманд на Хабі Алонса не будзе мець доўгага і заблытанага працягу. У апошнія некалькі дзён інфармацыя ад аўтарытэтных крыніц сведчыла пра тое, што іспанец дакладна не пакіне Леверкузен летам, а ў пятніцу ён афіцыйна абвясціў пра рашэнне.
І гэта цікавы сцэнар у кантэксце адразу двух клубаў, якія лічылі трэнера «Баера» сваёй прыярытэтнай мэтай – «Ліверпуля» і «Баварыі».
Алонса вырашыў яшчэ на сезон застацца ў «Баеры» і развіць поспех – у 2025-м будзе шанец узначаліць «Рэал»
Адразу некалькі крыніц далі практычна аднолькавыя інсайды пра планы Алонса – ён мае намер працягнуць працу ў «Баеры» яшчэ як мінімум на адзін сезон. Пра гэта паведамілі Фабрыцыа Рамана, Дэвід Арнштэйн з The Athletic, Sky Sports, Relevo і іншыя.
Не прайшло і паловы дня, калі коўч сам выступіў з заявай:
💬 «У мяне была добрая сустрэча з прадстаўнікамі «Баера», і я паведаміў ім, што застануся і працягну працаваць у клубе. Пасля размоў наконт сваёй будучыні я выкарыстаў перапынак, каб падумаць і прыняць рашэнне. Гэтае месца для мяне.
Мая праца ў «Баеры» не завершаная. Я хачу дапамагчы клубу і гульцам развівацца. Я яшчэ малады трэнер, але думаю, што гэта найлепшае рашэнне для маёй будучыні. Я не спяшаюся і ўпэўнены ў гэтым.
Удзячны «Баеру», кіраўніцтву, гульцам, заўзятарам. Я не буду каментаваць цікавасць з боку «Ліверпуля» або «Баварыі». Гэта вялікія клубы, і ў мяне ёсць цесныя сувязі з імі, але я знаходжуся там, дзе хачу быць.
Цяпер не час вырашаць сваю будучыню, я хачу развівацца ў «Баеры», – сказаў Алонса.
Ідэя палягае ў тым, каб развіць поспех каманды ў наступным сезоне – у прыватнасці, у Лізе чэмпіёнаў пасля верагоднага трыумфу ў Бундэслізе. Таксама сюды трэба дадаць, што раней была інфармацыя пра прыцягненне Алонса да планавання складу «Баера» на кампанію 2024/25.
Рамана адзначыў, што хутчэй за ўсё супрацоўніцтва сапраўды будзе доўжыцца ўсяго адзін год – у 2025-м стане актыўнай клаўсула ў кантракце Хабі, якой хочуць скарыстацца іншыя. Напрыклад, новым сур'ёзным прэтэндэнтам на Алонса будзе «Рэал».
Карла Анчалоці таксама пралангіраваў сваё пагадненне толькі на год, а Фабрыцыа дадаў, што коўч «Баера» да гэтага часу знаходзіцца высока ў спісе мадрыдцаў. Што самае важнае, яго кандыдатура вельмі падабаецца прэзідэнту Фларэнціна Перэсу. Інфармацыю пра «Рэал» пацвердзілі ESPN.
«Ліверпуль» ужо пераключыўся на іншыя варыянты – у прыярытэце Амарым і Дэ Дзербі
«Ліверпуль», як адзначыў Арнштэйн, «не шакіраваны» рашэннем Алонса – у клубе прадугледжвалі такое развіццё падзей і былі ў курсе. Мерсісайдцы прыйшлі да высновы, што няма больш сэнсу чакаць Хабі.
Паколькі гэты план цяпер фактычна спісаны, англічане пачалі прапрацоўваць іншыя варыянты замены для Юргена Клопа. Паводле даных The Guardian, гаворка ідзе пра Рубена Амарыма са «Спортынга» і Раберта Дэ Дзербі з «Брайтана».
Адступныя партугальца складаюць 17 мільёнаў фунтаў. Партугальскае выданне Record дадало, што «Ліверпуль» хоча сустрэцца з Амарымам пасля завяршэння сезона. 39-гадовы Рубен, нагадаем, у 2021-м у дэбютнай паўнавартаснай кампаніі заваяваў для «Спортынга» першы з 2002 года тытул, а зараз зноў ідзе лідарам у чэмпіянаце Партугаліі.
Пра Дэ Дзербі ж новых чутак не так шмат – толькі Mirror дадалі, што ён можа абысціся ў 12,8 мільёна фунтаў. Але спісваць гэты варыянт дакладна не трэба, бо новы спартыўны дырэктар «чырвоных» Рычард Х'юз вельмі вялікі прыхільнік італьянца – запрасіць яго ў «Борнмут» у 2022 годзе перашкодзіла толькі тагачасная змена кіраўніцтва клуба.
У «Баварыі» новы нечаканы галоўны прэтэндэнт – Рангнік. Абмяркоўваецца і вяртанне Фліка
Найвялікшы перапалох, здаецца, адбыўся ў «Баварыі». Па-першае, даносіліся інсайды, што, нягледзячы на відавочную пазіцыю Алонса, мюнхенцы не прыбіралі яго з топ-1 шортліста – маўляў, таму што на той момант не атрымалі афіцыйнай адмовы, хаця былі настроены песімістычна. Пра гэта паведамілі Арнштэйн і Фларыян Плетэнберг з Sky Sport Deutschland, а раней публічна складанасць пераходу іспанца каментаваў ганаровы прэзідэнт клуба Улі Хенес.
Па-другое, выплыла опцыя з прызначэннем Ральфа Рангніка, якога ўлетку чакае Еўра-2024 са зборнай Аўстрыі. Пра такі варыянт напісалі Bild, Kicker і Sport1, то бок гэта відавочна не выпадковы ўкід.
Адзначаецца, што ў Ральфа вельмі добрыя стасункі з прадстаўнікамі цяперашняга кіраўніцтва «Баварыі», а асабліва з новым спартдырэктарам Максам Эберлем, які тры гады таму хацеў запрасіць яго ў «Барусію» Менхенгладбах. Узначаліць мюнхенцаў – адна з «мар усяго жыцця» Рангніка, пра гэта нямецкім СМІ сказала «давераная асоба» коўча.
Хаця цалкам верагодна, што гэта частка плана запрашэння Алонса – год правесці з Ральфам, перавёўшы яго затым на пасаду ў структуры клуба (чым ён раней займаўся ў іншых месцах), і ў 2025-м зноў умяшацца ў барацьбу за Хабі. Тым больш, што па папярэдніх даных іспанец аддаваў перавагу менавіта «Баварыі», а не «Ліверпулю».
Мюнхенцы хочуць вызначыцца з новым трэнерам да канца красавіка. Альтэрнатыўная опцыя – вяртанне Ханса-Дзітэра Фліка. А вось прапанова Дэ Дзербі, як інфармуе Kicker, зараз менш верагодная з-за сумневаў датычна няведання мовы італьянцам. Гэтая ж крыніца сцвярджае, што Антоніа Контэ, Жазэ Маўрынью, Зінедзін Зідан і Юліян Нагельсман не разглядаюцца.
Дарэчы, «Баварыя», аказваецца, улетку выплаціць Томасу Тухелю ў выглядзе кампенсацыі ўвесь гадавы заробак па кантракце да 2025-га. Праўда, без бонусаў, якія былі прадугледжаны.
Фота: dpa picture alliance, Oscar Gonzalez/NurPhoto, D.Nakashima/AFLO, Eibner-Pressefoto/Michael Memmler
