Да сустрэчы ў Валенсіі! Гран Пры Малайзіі не выявіў чэмпіёна MotoGP 2022 года

Франчэска Баньяя ізноў перамог, ізноў у яго адбылася дуэль з яго будучым напарнікам па Ducati Lenovo Team Энеа Басціаніні. Але пакуль яшчэ дзейсны чэмпіён з Monster Energy Yamaha MotoGP Фабіа Куартарара зрабіў усё, каб вырашальным стаў фінальны этап гэтага сезону MotoGP, а не Гран Пры Малайзіі. І ў яго атрымалася!

Да сустрэчы ў Валенсіі! Гран Пры Малайзіі не выявіў чэмпіёна MotoGP 2022 года

Фота: motogp.com

Франчэска Баньяя ізноў перамог, ізноў у яго адбылася дуэль з яго будучым напарнікам па Ducati Lenovo Team Энеа Басціаніні. Але пакуль яшчэ дзейсны чэмпіён з Monster Energy Yamaha MotoGP Фабіа Куартарара зрабіў усё, каб вырашальным стаў фінальны этап гэтага сезону MotoGP, а не Гран Пры Малайзіі. І ў яго атрымалася!

Абавязкова ўсё атрымаецца і ва Украіны. Яна ўжо дзявяты месяц годна супрацьстаіць агрэсіі з боку расійска-фашысцкіх захопнікаў, і паступова вызваляе ад іх сваю зямлю. Звар’яцеламу расійскаму дыктатару цяпер застаецца толькі пужаць увесь свет ядзернай катастрофай, бо толькі на катастрофы яго войска і здатнае.

Сапраўднай катастрофай будзе, калі калгасны дыктатар кіне ў пекла вайны Беларусь. Ён здаў яе агрэсару для здзяйснення ваенных злачынстваў, аднак сітуацыю пакуль можна выправіць. Беларускае войска яшчэ можа выправіць памылку, якую яно дапусціла ў 2020 годзе. Агрэсар ва Украіне будзе знішчаны, а следам за ім – і мясцовая дыктатура. І лепей будзе, калі ўкраінцы і беларусы застануцца пасля гэтага сябрамі. Слава Україні! Героям Слава! Верым! Можам! Пераможам! Жыве Беларусь!

Вельмі хацелася б, каб вайна ва Украіне скончылася раней, чым бягучы сезон MotoGP, да канца якога засталося ўсяго два тыдні. Добрых навін дзве: па-першае, яна абавязкова скончыцца перамогай Украіны, па-другое, на фінале галоўнага мотагоначнага чэмпіянату планеты будзе горача.

Было так і на Гран Пры Малайзіі, першым, як і папярэдні Гран Пры Аўстраліі, за тры гады. Бо калі побач апынаюцца два італьянцы, адзін з завадской каманды Ducati і адзін з Gresini Racing, горача бывае заўсёды. А побач Франчэска Баньяя і Энеа Басціаніні аказаліся амаль адразу пасля старту, хаця Пэка пачынаў гонку на трасе Сепанг з дзявятай пазіцыі.

Кваліфікацыя для яго напярэдадні выдалася складанай – яму прыйшлося браць удзел у абедзвюх сесіях, у абедзвюх жа ён падаў. А вось Фабіа Куартарара – не. Што, аднак, не дапамагло Эль Д’ябла быць хутчэй за свайго галоўнага канкурэнта па чэмпіянаце і кваліфікавацца вышэй за дванаццатую пазіцыю.

Затое толькі за першы круг дзейсны чэмпіён прабіўся ў Топ-5, а на пятым кругу паспяхова атакаваў шасціразовага чэмпіёна прэм’ер-катэгорыі з  Repsol Honda Team Марка Маркеса. Іспанец, як і Баньяя, у кваліфікацыі таксама прабіваўся ў другі сегмент з першага, і нейкім цудам, як ён сам потым прызнаўся, паказаў другі вынік. Аднак у гоначным рэжыме тэмпу яму неяк не ставала, і паступова ён адкаціўся на сёмую пазіцыю.

Значна лепей усё было ў яго суайчынніка з Prima Pramac Racing Хорхе Марціна, уладальніка поўла Гран Пры Малайзіі. Ён даволі ўпэўнена трымаўся на першай пазіцыі і трымаў Баньяю на бяспечнай для сябе адлегласці ў секунду з малым. Да самага сёмага круга, на якім упаў у пятым павароце і выбыў з барацьбы.

Адпаведна, барацьба Баньяі і Басціаніні стала барацьбой за перамогу, і саступаць у ёй не збіраўся ні адзін з іх. Надта актыўна яны гэтым разам пазіцыямі не абменьваліся. Толькі Энеа абагнаў Франчэска на адзінаццатым кругу ў чацвёртым павароце, нырнуўшы ўнутр на познім тармажэнні, але той адказаў на трынаццатым кругу ў пятнаццатым павароце, вярнуўшы сабе лідарства. Але фінішавалі абодва ізноў амаль што разам – Басціаніні саступіў будучаму напарніку 0,270 секунды.

Куартарара адстаў ад Баньяі амаль на тры секунды і заняў трэцяе месца, але затое адклаў вырашэнне пытання аб чэмпіёне MotoGP 2022 года да фінальнага этапу ў Валенсіі. Італьянцу, які мае 258 ачкоў, гоншчык Ямахі саступае дваццаць тры. Гэта шмат, і калі ён нават пераможа на апошнім Гран Пры, Баньяі, каб стаць чэмпіёнам, дастаткова будзе заняць месца, не ніжэй за чатырнаццатае. Але здарыцца ў гонках можа ўсё, што заўгодна і з кім заўгодна.

Гоншчык Aprilia Racing Алейш Эспаргара ў Малайзіі замкнуў першую дзясятку, а ў чэмпіянаце па-ранейшаму замыкае першую тройку, але ў чэмпіёнскай гонцы ўжо не ўдзельнічае, маючы 212 балаў. Пры гэтым ён усяго на адзін апярэджвае Басціаніні. У камандным заліку ж пераможца ўжо вядомы – ім з 447 ачкамі ўжо з’яўляецца Ducati Lenovo Team. Aprilia Racing, у якой 334 ачкі, застаецца на другой пазіцыі, Red Bull KTM Factory Racing трэція з 306 баламі.

Вырашальны Гран Пры Валенсіі пройдзе ўжо меней чым праз два тыдні – 4-6 лістапада.

Іншыя пасты блога

6 студзеня, 15:14