Заўзятаркі «Манчэстэр Юнайтэд» выступілі супраць вяртання Грынвуда ў каманду

Супольнасць заўзятарак «Манчэстэр Юнайтэд» выступіла з заявай супраць вяртання ў каманду паўабаронцы Мэйсана Грынвуда, які абвінавачваўся ў згвалтаванні.

«Сёння мы, заўзятаркі «Манчэстэр Юнайтэд», патрабуем ад клуба выконваць свой абавязак клапаціцца аб сваіх заўзятарках і супрацоўніцах і прадэманстраваць нулявую цярпімасць да актаў гвалту ў адносінах да жанчын, адмовіўшыся вяртаць Мэйсана Грынвуда ў каманду. Сітуацыя зразумелая – вяртанне Грынвуда ўзаконьвае і нармалізуе сэксуальны і хатні гвалт. Ён кажа іншым гульцам, а таксама мужчынам і хлопцам, якія глядзяць на яго, што жорсткае абыходжанне з жанчынамі прымальна, не мае наступстваў, і не паўплывае на вас і не разбурыць вашу кар’еру.

Гэта таксама кажа нам як жанчынам, што мы не маем значэння. Ён кажа жанчынам-супрацоўніцам «МЮ», што іх працадаўца з задавальненнем прымусіць іх працаваць разам з крыўдзіцелем, і паведамляе сотням тысяч заўзятарак, што падтрымка любімай каманды азначае падтрымку мужчын, якія жорстка абыходзяцца з такімі ж жанчынамі, як мы. Гэта кажа нам, што наша бяспека не мае значэння, наш досвед не мае значэння; што 1 з 4 жанчын, якія падвергліся хатняму і/ці сэксуальнаму гвалту ў Вялікабрытаніі – не мае значэння. Гэта кажа нам, што людзі, якія зарабляюць клубу грошы – маюць значэнне; не мы, нашы калегі-фанаткі, маці, сёстры ці дачкі. У апошнія гады клуб запусціў розныя ініцыятывы, нібыта спрыяючы інклюзіўнасці і разнастайнасці, але «Усе чырвоныя – роўныя» – нічога не азначае, калі правы тых, хто здзейсніў гендэрны гвалт, раўнейшы за тых, хто перажыў гэта.

Мы ведаем, што зараз шматмільённыя PR-кампаніі раскручваюць наратывы, каб падтрымаць яго патэнцыйнае вяртанне. «Бацька пакаяўся і змяніў сваё жыццё і проста жадае падтрымаць свайго партнёра і дзіцяці». «Юны геній, які здзейсніў памылку, але годны другога шанцу». Пагрозы партнёру сэксуальным гвалтам не «памылка» – гэта наўмысны, мэтанакіраваны гвалт.

Зачыненыя вечарынкі і папярэджанні паліцыі, відаць, былі «памылкай», тое, што яго выгналі з размяшчэння зборнай Англіі і адправілі дадому за парушэнне правілаў – таксама было, відавочна, «памылкай». Праблема тут заключаецца не ў гульцу, які «здзейсніў памылку», а ў гульцу, увесь час дэманструе надзвычайную фанабэрыстасць, кантроль і выключнасць, і не выяўлялага нічога, акрамя ігнаравання і пагарды да таго, што значыць уяўляць гэты вялікі клуб. Кожны робіць памылкі, але не кожны робіць гэта як Грынвуд, калі мае ўладу і прывілеі. Калі вы хочаце гуляць на самым высокім узроўні ў самым вялікім клубе свету, вашы паводзіны будзе падвяргацца найвышэйшаму кантролю, падсправаздачнасці і чаканням.

Рашэнне вышэйшага кіраўніцтва «МЮ» аб вяртанні Грынвуда пакажа нам, заўзятарам, усё, што трэба ведаць аб іх здольнасці кіраваць гэтым клубам, а таксама аб тым, ці ёсць у іх сапраўдная гатоўнасць слухаць фанатаў, узаемадзейнічаць з імі і падтрымліваць іх у важных пытаннях. Ці гэты клуб для іх толькі сродак камерцыйнага поспеху, трафеяў, спонсарства і прыбыткі? Ці яны сапраўды падзяляюць наша бачанне Манчэстэр Юнайтэд як вялікай установы, якая існуе як месца прыналежнасці і супольнасці для тых, хто клапоціцца аб яго каштоўнасцях і традыцыях?

Мы заклікаем клуб дзейнічаць правільна. Для іх заўзятараў, супрацоўнікаў, для мільёнаў маладых рабят ва ўсім свеце, якія глядзяць на нашых гульцоў як на герояў і ўзоры для пераймання, а таксама для мільёнаў жанчын, чые жыцці былі азмрочаныя гвалтам і злоўжываннямі. Тым, хто прымае рашэнне ў клубе, памятайце; гэта выходзіць за межы футбола. Гэтае рашэнне ёсць адлюстраваннем вас, вашай маралі; аб тым, кім вы з’яўляецеся як асобы і як людзі. Ці будзеце вы стаяць на баку крыўдзіцеляў або на баку пацярпелых? Гісторыя рассудзіць ваш выбар. Пераканайцеся, што вы выбралі правільна», – гаворыцца ў заяве.

21-гадовы гулец быў арыштаваны ў пачатку мінулага года, але ў лютым 2023-га суд зняў з яго ўсе абвінавачанні. Аднак «Ман Юнайтэд» праводзіць уласнае расследаванне і пакуль не дапускае Грынвуда да трэніровак з камандай.