У Беларусі тры браты-хакеісты запусцілі ўласны брэнд спартыўнага адзення. Бузава ўжо атрымала ад іх падарунак
Двое ўсё яшчэ вельмі перспектыўныя.
Беларускі спорт бачыў нямала братоў-хакеістаў. Самымі вядомымі з'яўляюцца Андрэй і Сяргей Касціцыны, якія гулялі ў НХЛ. Да аналагічнай вышыні сёння імкнуцца і браты Протасы – нядаўна старэйшы, Аляксей, падпісаў 5-гадовы кантракт з «Вашынгтонам», а малодшы Ілля пакуль змагаецца ў USHL – галоўнай юніёрскай хакейнай лізе ЗША.
Братам Каўгарэням на гэтым фоне цяжка пахваліцца спартыўнымі поспехамі.
24-гадовы Ілля (старэйшы) па юнаках гуляў у ЗША і Канадзе, а затым спрабаваў працягнуць карʼеру ў трэцім дывізіёне Швецыі, падпісаўшы ўлетку 2021-га кантракт з «Бальнэсам». Аднак з хакеем у выніку форвард завязаў.
20-гадовы Цімафей Каўгарэня (сярэдні) пагуляў у сезоне-2021/22 у WHL за «Спакейн», а цяпер выступае за мінскае «Дынама». У 31 матчы рэгулярнага чэмпіяната КХЛ гэтага сезона форвард набраў 3+3 пры паказніку карыснасці «-- 4». Яшчэ чатыры пункты ён выбіў у экстраліге, гуляючы за «Дынама-Маладзечна». Туды галоўны трэнер мінчукоў адпраўляў гульца ўвосені 2023 года, бо лічыў, што той «задрамаў крыху». Расійскія медыі паведамлялі, што за «зуброў» Цімафей зарабляе менш за 1 тысячу долараў на месяц.
Гэты брат актыўна ўдзельнічае ў маркетынгавых мерапрыемствах клуба. Вось ён на зімовай рыбалцы.
А тут здымаецца ў шоу для дзяржТБ.
Самы малодшы з братоў – 18-гадовы Арсень Каўгарэня – падае надзеі ў «Юнацтве». У мінулым сезоне форвард быў прызнаны найлепшым маладым гульцом Экстралігі. У сезоне-2023/24 ён мае ў актыве 15 галоў і 9 перадач у 41-м матчы.
Цімафей і Арсень ужо перасякаліся ў моладзевай зборнай Беларусі.
Акрамя хакея братоў абʼядноўвае яшчэ адна рэч – прыблізна паўтара гады таму яны запусцілі ўласны брэнд адзення Kaga wear. Як заяўлена на афіцыйным сайце, гэта «унікальны беларускі брэнд, створаны спецыяльна для спартсменаў і спартыўных фанатаў». Сярод «унікальных» тавараў – спартовыя касцюмы, легінсы і футболкі з досыць сур'ёзнымі коштамі.
Мужчынскі худзі з лога брэнда абыдзецца ў 188 рублёў са зніжкай (а калі без яе, то 240 рублёў), за жаночы просяць 148 рублёў пры першапачатковым кошце 175 рублёў.
Футболкі з лога каштуюць 98 рублёў.
А за жаночыя спартыўныя касцюмы давядзецца выкласці ад 268 рублёў да 328 рублёў.
Калі што, адзенне для прымервання могуць даставіць да вашага дому, але наўзамен патрабуюць чыстае цела.
Для прасоўвання браты выкарыстоўваюць клубныя пляцоўкі. Напрыклад, ладзяць розыгрышы на матчах «Юнацтва».
І выкарыстоўваюць сацсеткі беларускай федэрацыі хакея.
Ілля і Цімафей Каўгарэні скарысталіся магчымасцю і падарылі свой худзі расійскай селебрыці Вользе Бузавай, якая падтрымлівае Расію ў вайне з Украінай. У Беларусь спявачка наведваецца, каб судзіць музычнае шоў на прапагандысцкім ТБ.
Для старэйшага з братоў брэнд адзення – не першая спроба зарабляць па-за хакеем. На рэсурсе для пошуку рэпетытараў можна знайсці прапанову Іллі Каўгарэні па занятках англійскай мовай. Кошт - 25 рублёў за гадзіну. Навучанне арыентаванае на дашкольнікаў, падарожнікаў і тых, хто хоча засвоіць размоўны «інгліш». Яшчэ калі што былы хакеіст можа павучыць бодзібілдынгу.
Браты не першыя, хто спрабуе зарабляць на ўласным брэндзе вопраткі. Калісьці такім жа шляхам ішлі Дарʼя Домрачава і Кацярына Сныціна. Сёння сацсеткі брэнда былой біятланісткі неактыўныя, а Сныціна абвясціла пра закрыццё праекта.
