Мінскае «Дынама» засталося без хатняй арэны на матч плэй-оф. «Зуброў» пасунула фаварытка (былая?) Пуціна з гімнастыкі
А супернік не гатовы да саступак.
25 лютага ў матчы заключнага тура рэгулярнага сезона КХЛ паміж СКА і «Куньлунем» вызначыўся супернік мінскага «Дынама» ў плэй-оф турніру.
Каманда адыёзнага расійскага трэнера Рамана Ратэнберга на хатняй пляцоўцы нечакана прайграла кітайскаму аўтсайдару 2:3 і страціла шанц стаць першай у Заходняй канферэнцыі па выніках «рэгуляркі», адпусціўшы маскоўскае «Дынама». З ім мінчукам, якія аселі на восьмай пазіцыі, і сустракацца.
У календары КХЛ матчы першага раўнда плэй-оф паміж мінскім і маскоўскім «Дынама» мусяць адбыцца 1 і 3 красавіка ў расійскай сталіцы, а 5 і 7 – у беларускай. Калі чатырох сустрэч будзе недастаткова, каб вызначыць пераможцу, то дадатковыя гульні запланаваныя на 9 сакавіка ў Маскве і на 11-е ў Мінску. Калі справа дойдзе да сёмага матчу, ён адбудзецца 13 сакавіка на хатняй пляцоўцы масквічоў.
Ці то мінчукі не спадзяваліся на выхад у плэй-оф, ці то былі ўпэўненыя, што арэна ў гэтыя дні ўсё роўна будзе вольнай, але так сталася, што пляцоўка аказалася забраняванай у патрэбныя датэ не пад хакей. І сёння выглядае на тое, што каманда Дзмітрыя Квартальнава не зможа правесці першы з хатніх матчаў на «Мінск-Арэне» праз занятасць аб'екта.
«Беларуская арэна недаступная для хакея з 3 па 6 сакавіка. А трэяцяя гульня якраз запланаваная на гэтыя даты ў Мінску. І што далей? Кажуць, што ёсць нейкі варыянт, які не задавальняе расійскі клуб. Карацей, не ўсё так адназначна», – напісаў у сваім тэлеграм-канале расійскі журналіст Аляксей Шаўчэнка.
«Мінск-Арэна» не адзіная хакейная пляцоўка ў сталіцы – ёсць яшчэ «Чыжоўка-Арэна», якая ў свой час прымала матчы чэмпіянату свету, а сёння зʼяўляецца хатняй для «Юнацтва» ў экстралізе. Аднак гэтая пляцоўка не адпавядае патрабаванням КХЛ.
Яшчэ адным варыянтам для «Дынама» зʼяўляецца арэна ў Бабруйску, але гэта 170 кіламетраў ад Мінска. 12 гадоў таму «Бабруйск-Арэна» ўжо прыняла два матчы плэй-оф КХЛ паміж мінскім і маскоўскім «Дынама». Гаспадары тады саступілі 1:3 і 2:4. Але, па чутках, менавіта гэты варыянт не падабаецца гасцям.
Дык што за мерапрыемства здольнае пасунуць «Дынама» з хатняй арэны ў найважнейшы адрэзак сезона? Дзіўна, але гэта не чарговы шабаш рэжымнікаў і не канцэрт зоркі сусветнага маштабу, (зоркі Беларусь абмінаюць даўно). Проста 5 сакавіка на «Мінск-Арэне» запланавана шоу па мастацкай гімнастыцы, арганізаванае расіянкай Алінай Кабаевай.
На сёння на сайце сталічнай арэны няма згадак гімнастычныга шоў, няма інфармацыі пра фестываль «Аліна» і на сайтах беларускіх білетных аператараў. Затое некаторыя падрабязнасці можна знайсці на сайце міжнароднай асацыяцыі клубаў мастацкай гімнастыкі «Нябесная грацыя». Так, у матэрыяле ад 13 лютага гаворыцца, што 2 сакавіка фестываль пройдзе ў Сочы, а 5-га – у Мінску.
Вядома, канкураваць з шоу Кабаевай даволі складана. І справа не ў тым, што гэта тытулаваная спартсменка з вялікай вагой у спартыўным свеце, а ў тым, што яе ўжо даўно называюць не проста фаварыткай расійскага дыктатара Уладзіміра Пуціна, а маці яго дзяцей.
Хаця і тут усё не так адназначна. Апошнія тыдні медыя суседзяў пішуць нібыта пра новую сімпатыю Пуціна. Гэта 39-гадовая Кацярына Мізуліна, якая зʼяўляецца кіраўніком так званай «Лігі бяспечнага інтэрнэту» – арганізацыі, якая дапамагае расійскаму ўраду ўмацоўваць цэнзуру і вымушае баяцца стваральнікаў інтэрнэт-кантэнту і дзеячаў культуры, чыя пазіцыя супярэчыць пуцінскай прапагандзе. У розны час Мізуліна асабіста напісала даносы на журналіста Юрыя Дудзя, гурт «Бі-2», акцёра Андрэя Паніна, рэпера Аксімірона і іншых вядомых публічных асоб.
А яшчэ жанчына запісвае крынжовыя відэа, дзе адкрывае рот, напрыклад, пад песні няскрэпных Queen.
Расійская праваабаронка Вольга Раманава ў адным са сваіх інтэрв'ю заявіла, што «Каця Мізуліна цалкам адпавядае густу Пуціна. Гэтая Барбі заўсёды яму вельмі падыходзіла». Шэраг СМІ таксама сцвярджаюць, што яны «сталі блізкія».
Сітуацыя, якая склалася з арэнай, не ўзрадавала тых, хто яшчэ сочыць за беларускім хакеем. Інтэрнэт-карыстальнікі не ўпэўненыя, што для гімнастыкі ўвогуле патрэбная такая вялікая пляцоўка.
Іншыя мяркую, што калі трэба, на фестываль нагоняць школьнікаў. Хаця ёсць і тыя, каго гімнастычнае мерапрыемства цікавіць.
Але большасць карыстальнікаў лічыць, што перанесці шоў Кабаевай не ўдасца.
А ёсць і тыя, хто знайшоў у гэтым прычыну паражэння СКА.
Мінскае «Дынама» пакуль ніяк не каментавала сітуацыю з хатняй пляцоўкай, таму адзінае, што застаецца заўзятарам, спрабаваць дагрукацца да кагосьці ў сацсетках.
