«Энергетык-БДУ» зусім слабы ў гэтым сезоне, але ўсё роўна мае ў складзе людзей, да якіх варта прыгледзецца

Сезон-2023 для «Энергетыка-БДУ» праходзіць даволі сумна. Нават калі камандзе вярнуць 23 пункты, што забрала федэрацыя за дзіўныя матчы, то гэтага хопіць толькі на тое, каб дзяліць 13-е месца з «Нафтанам» і «Белшынай». Пакуль жа праект Анатоля Юрэвіча – жалезны кандыдат на паніжэнне ў класе (да перадапошняга месца – восем пунктаў, так што разлічваць на выратаванне не варта).

Зрэшты, першапачаткова «Энергетык-БДУ» задумваўся не для таго, каб браць медалі, а каб рыхтаваць гульцоў, якіх можна было б перапрадаць альбо ўнутры ЧБ, а яшчэ лепш – за мяжу. Клуб паспяхова спраўляўся з гэтай задачай, і нават сёння, калі з вынікамі ўсё дрэнна, у складзе ёсць людзі, да якіх варта прыгледзецца.

Станіслаў Кляшчук, 23 гады, брамнік

Пасля зімовага пераходу Арцёма Макаўчыка ў мінскае «Дынама» гэты галкіпер стаў першым нумарам «студэнтаў». Кляшчук перабраўся ў «Энергетык-БДУ» у пачатку 2022-га, прыехаўшы ў арэнду якраз з «Дынама». Мінулай зімой кантракт футбаліста з «бела-блакітнымі» завяршыўся, таму ён змог паўнавартасна падпісацца з праектам Юрэвіча. Перад стартам сезона-2023 трэнерскі штаб «Энергетыка-БДУ» не бянтэжыла, што Кляшчук мае ў вышэйшай лізе ўсяго адзін матч – у чэрвені 2022-га супраць «Белшыны» (1:0).

Кіпер па сваёй манеры чымсьці нагадвае Сяргея Чэрніка: нядрэнна выглядае на стужачцы, здольны выцягнуць складаныя ўдары здалёк. Часам ратуе ў складаных сітуацыях, якія ўзнікаюць даволі блізка ад варот. Як у эпізодзе ў канцы матчу з «Нёманам» (1:3), калі гродзенцаў у атацы было ўдвая больш, чым абаронцаў «студэнтаў» (адзнака 4:50).

Калі Станіславу ўдасца падцягнуць гульню на выхадах, то ён мае рэальныя шанцы стаць першым нумарам у клубе з верхняй паловы табліцы. На карысць Кляшчука кажа і статыстыка – у 16 матчах брамнік каманды-аўтсайдара прапусціў усяго 20 мячоў пры пяці «сухарах».

Абінур Нурымбет, 18 гадоў, паўабаронца

«Раю прыгледзецца да гэтага гульца», – сказаў трэнер «студэнтаў» Павел Раднёнак пасля жнівеньскага падпісання маладога легіянера з Д2 Казахстана. Пасля прылёту ў Мінск Нурымбет узяў нумар 11, вольны пасля Іллі Грышчанкі, які зʼехаў гуляць у акупаваны Крым.

У казахстанскім міноры гулец дзейнічаў на пазіцыі вінгера, дзе ў стылі Гулжыгіта Алыкулава дэманстраваў высокую хуткасць і ўменне абыходзіцца з мячом. Аднак Анатоль Юрэвіч разгледзеў у Нурымбеце, які ўлетку дэбютаваў за зборную Казахстана U-19, цэнтральнага паўабаронцу з арыентацыяй на атаку. Менавіта ў такім статусе Нурымбет правёў усе свае чатыры матчы ў вышэйшай лізе. Футбаліст не баіцца ісці ў обыгрыш, і часта робіць гэта паспяхова. А часам дрыблінгам правакуе супернікаў на фалы, як гэта было ў гульні з «Нёманам» (1:3), калі казахстанец зарабіў 11-метровы.

Таксама гулец добра бʼе з абедзвюх ног. Для Чэрніка гэта стала невырашальнай задачай (2:3).

Яраслаў Макушынскі, 25 гадоў, абаронца

Гэтага леваногага футбаліста (па стылі чымсьці нагадвае Мікалая Золатава) Юрэвіч адшукаў у другой лізе – і той хутка стаў у «Энергетыку-БДУ» сваім. Хутчэй за ўсё, коўч шануе невысокага латэраля (166 см) за гатовасць шмат бегаць і шмат змагацца. Па большай частцы ў «студэнтаў» Макушынскі займаецца развіццём атак і чарнавой працай, таму нядзіўна, што мае ўсяго 0+2 у 57 матчах вышэйшай лігі за «Энергетык-БДУ».

Кліент агента Дзмітрыя Хлебасолава мог расстацца са «студэнтамі» яшчэ мінулай зімой, але вырашыў правесці ў камандзе яшчэ сезон. У траўні пасля пазбаўлення «Энергетыка-БДУ» 23 пунктаў Макушынскі, самы ўзроставы выканаўца ў ростары Юрэвіча, паведаміў пра рашэнні пакінуць Сямашка ў канцы 2023-га.

Аляксандр Міхаленка, 21 год, абаронца

На свае 21 год выхаванец мінскага «Дынама» дастаткова пакалясіў па беларускіх клубах. Да «Энергетыка-БДУ» пабываў у арэндах у «Спадарожніка», «Дняпра» і «Іслачы», дзе практыку ў вышэйшай лізе атрымліваў толькі ў Рэчыцы. На сезон-2023 дынамаўцы аддалі футбаліста на Сямашка.

Юрэвіч паставіў Міхаленку на знаёмы правы фланг. Праўда, там абаронцу прыйшлося не толькі адказваць за абарону, але і актыўна ісці ў атаку, закрываючы ўвесь край. У чэмпіянаце ён дэманструе, што ўмее нядрэнна чытаць гульню, а яшчэ спрабаваў сябе ў розных амплуа: і цэнтральным абаронцам, і паўабаронцам, а неяк нават форвардам.

Са сваёй шматзадачнасцю на флангу Міхаленка спраўляецца даволі паспяхова. Латэраль паспявае як падключацца да атак, дзе можа небяспечна прастрэліць у штрафную, так і не забываецца на абарону.