Раналду атрымлівае асалоду ад заслужанай пенсіі: папулярызуе футбол у саудаў і вярнуў сабе вайб часоў «Рэала»

Крышціяну Раналду ў Саудаўскай Аравіі знаходзіцца ўжо каля двух месяцаў. Калі стартавы адрэзак новага этапу атрымаўся змазаным праз праблемы з рэгістрацыяй, дыскваліфікацыяй і кароткай безвыніковай серыяй, то ў апошнія тыдні ўсё стала на свае месцы – легендарны партугалец набраў форму, а зараз забівае і асістуе за «Аль-Наср».

Аднак знаходжанне Раналду на Блізкім Усходзе трэба ацэньваць не толькі па спартыўных дасягненнях. У яго шмат працы ў іншых сферах, вынікі якой ужо заўважныя. Распавядаем, як адчувае сябе Крышціяну ў новым асяроддзі і насколькі значным стаў яго ўплыў.

Крыш нарэшце знайшоў спакой пасля вельмі цяжкага года

5 галоў і 2 асісты ў трох апошніх матчах – даволі паказальная статыстыка, нягледзячы на адкрыта слабы ўзровень чэмпіянату. Гэтыя лічбы і гульня форварда даюць зразумець, што ён сапраўды мог застацца ў Еўропе. Хай не ў топ-клубе з вялікімі амбіцыямі, але ва ўмоўнай Партугаліі, адкуль са слоў самога Крышціяна ў яго былі прапановы, ці ў камандзе ЛЕ/ЛК. Толькі вось пытанне, ці патрэбна гэта было Раналду? Наўрад ці.

2022-ы выдаўся для Крышціяну надзвычай складаным па многіх прычынах. Перш за ўсё, па сямейных. Увесну ён страціў нованароджанае дзіця, а ў ліпені адлучыўся ад «Манчэстэр Юнайтэд» праз тое, што дачка патрапіла ў лякарню. Адгэтуль пацягнуўся клубок няўдач і ўтчарыўся большы ціск, чым калі-небудзь раней: дрэнная форма, статус запаснога ў «МЮ», інтэрв'ю Пірсу Моргану, разрыў кантракту з клубам, разбураная мара на ЧС-2022.

Здаецца, што пасля такой серыі расчараванняў Раналду вырашыў, што не хоча больш нічога даказваць. Якім бы Крыш не быў матываваным на працягу ўсёй кар'еры, але наступіў менавіта той момант, калі мэта не апраўдвала б сродкі. У прыгнечаным стане ў свае 37 ісці ў клуб сярэдняга рангу і далей сутыкацца з крытыкай, якая часам пераходзіла межы – не тое, ад чаго партугалец і раней атрымліваў задавальненне.

А калі Раналду і плануе камбэк у вялікую гульню, то паўза і перазагрузка ў Саудаўскай Аравіі – цудоўны варыянт. Там у яго ўсё добра.

У Саудаўскай Аравіі пачаўся «культ Раналду» – гэта не можа яму не падабацца

У «Аль-Насры» Раналду атрымаў тое, па чым дакладна засумаваў – ён аказаўся ў цэнтры падзей у пазітыўным святле. Эпізодамі гэта навявае вайб часоў «Рэала». Крышціяну – зноў галоўная зорка, атрымлівае прызнанне і купаецца ў славе. Магчыма, вось яна – галоўная прычына пераезду на Блізкі Усход.

Калі ў студзені былі сумневы наконт рашэння Раналду, то зараз яны паступова знікаюць. Крышціяну сапраўды ўсяго дасягнуў у Еўропе, таму, улічваючы вышэйзгаданыя праблемы, такая футбольная пенсія – цалкам заслужаная.

Трыбуны забітыя банерамі з тварам партугальца, супернікі пасля матча чакаюць ля распранальні са сваімі дзецьмі для сумеснага фота, а заўзятары на працягу 90 хвілін скандуюць прозвішча свайго новага капітана – што можа быць прыемней?

Перфоманс ультрас:

Плакаты, якія можна заўважыць ледзь не ў кожным кадры трансляцыі:

Новая ўлюбёная крычалка прыхільнікаў «Аль-Насра»:

Футбалісты іншых каманд, якія не прапускаюць шанец на асабістую сустрэчу з КрыРа:

Крыш мае шалёны заробак, атрымлівае асалоду ад сваёй гульні, адпачывае ад надакучлівых журналістаў і адчувае сябе выдатна. А яшчэ – сапраўды выконвае добрую місію.

Эфект Раналду ў папулярызацыі футбола ўжо прыкметны – у выйгрышы пакуль усе бакі

Словы Раналду пра спробы паўплываць на развіццё футбола ў рэгіёне – гэта зусім не байкі. Па стане на сёння працэс ужо паспяхова запушчаны, а гэта ён яшчэ нават не ўдзельнічаў у маштабных кампаніях, якія дакладна будуць, бо прапісаныя ў кантракце (тыя ж камерцыйныя выплаты).

1. Раналду заахвоціў мясцовых жыхароў цікавіцца футболам

Да падпісання Крышціяну дамашнія матчы «Аль-Насра» ў сярэднім наведвала каля 8 тысяч заўзятараў, што менш за паказчыкі ў трэцяй лізе Англіі. Фактар партугальца імгненна паўплываў на сітуацыю. На дэбютнай гульні хатні стадыён быў запоўнены цалкам і сабраў 25 тысяч гледачоў, а падобная тэндэнцыя назіраецца і ў выязных сустрэчах – «Аль-Фатэх», напрыклад, сабраў 17,6 тысяч, калі да іх у госці прыехаў Раналду.

Галкіпер «Аль-Тавуна» вось скардзіўся, што цяпер цяжка патрапіць на матчы з «Аль-Насрам»: «Сёння вы шукаеце квіткі і не можаце іх знайсці. Раналду – гэта хлопец, на якога ўсе хочуць паглядзець».

Гэта, безумоўна, вялізны плюс для саудаў. Няхай выключна з-за Крышціяну, але публіка пачынае сачыць за лігай. Хтосьці прыходзіць на стадыён упершыню і захапляецца гэтай атмасферай, хтосьці прыводзіць дзяцей, якія пасля святкавання SIUUU пачынаюць марыць пра уласную прафесійную кар'еру, а хтосьці вяртае страчаную раней цікавасць.

Шэйхам зараз трэба разумна гэта выкарыстоўваць і стварыць належныя ўмовы для далейшага прагрэсу, а з іх грашыма праблем з гэтым узнікнуць не павінна. І тады, магчыма, наступныя чэмпіянаты свету стануць для зборнай паспяховымі не толькі з пункту гледжання гульні, але і з пункту гледжання выніку.

2. Крыш дапамог звярнуць увагу на свой новы чэмпіянат у іншых рэгіёнах

Працягваецца не толькі папулярызацыя футбола ў краіне, але і краіны ў спартыўным свеце. Пасля трансферу Раналду агенцтву IMG удалося прадаць правы на трансляцыі чэмпіянату (або выключна матчаў «Аль-Насра») у 36 краінах свету, сярод якіх Італія, Францыя, Партугалія, Германія, Мексіка, Вялікабрытанія, Турцыя і іншыя.

Таксама саудаўскае першынство ўсё часцей асвятляецца ў прэсе і сацсетках, дзе далей працягваецца разлютаваная інтэрнэт-барацьба хейтэраў і фанаў.

3. Раналду не забыўся і пра жаночы футбол

Саудаўская Аравія ў апошнія гады пад кіраўніцтвам кронпрынца Махамеда бін Салмана пачала адыходзіць ад статусу патрыярхальнай краіны да больш ліберальнага напрамку. Так, істотныя праблемы ў гэтым пытанні да гэтага часу ёсць, але выпраўленне сітуацыі быццам бы працягваецца.

Раналду сваю місію ў гэтым напрамку таксама пачаў – звяртае ўвагу на жаночы футбол, выкарыстоўваючы свой галоўны актыў, а менавіта сацыяльныя сеткі. Спачатку Крышціяну наведаў трэніроўкі перад важным матчам, а пасля гістарычнай дэбютнай перамогі ў лізе павіншаваў дзяўчат у сваіх шматмільённых інстаграме і твітэры.

Прадстаўнікі жаночага калектыву расказалі пра ўплыў Раналду на падрыхтоўку да вырашальнай часткі сезона. Галкіперка «Аль-Насра», напрыклад, заявіла, што «візіт партугальца пазітыўна адбіўся на маральным стане, а агульныя фота і дыялог дадалі матывацыі».

А галоўны трэнер увогуле назваў прысутнасць Крышціяну сакрэтам да поспеху:

А што ў самога Раналду з матывацыяй?

Крышціяну застаўся тым жа Крышціяну – зрабіўшы покер супраць «Аль-Вехдзі», ён бег забіваць пяты і асіставаць партнёрам. Раналду досыць шчыра радуецца галам, перажывае падчас прагляду ВАР (што ў Саудаўскай Аравіі чамусьці звычайна займае вельмі шмат часу) і расчароўваецца з-за памылак.

Так, гэтая ліга знаходзіцца на значна слабейшым узроўні, але Раналду нават у такіх умовах не адбывае нумар. Магчыма, рыхтуецца да камбэку, магчыма, атрымлівае асалоду ад сваёй перавагі над супернікамі, а магчыма – проста не можа па-іншаму.

Фота: IMAGO/MB Media Solutions, Cristiano Xtra, Khalid Alhaj/MB Media/Getty Images, AFP via Getty Images