Гоначная псіхапатыя НЕ ВАЙНЕ!
Блог

1:1 на карысць Гіртса, а Гайсэр і так ужо амаль перамог. Мотакросавы Гран Пры Швецыі сенсацый не прынёс

Фота: mxgp.com

З чыста матэматычнага гледзішча інтрыга яшчэ захоўваецца і ў старэйшай катэгорыі сусветнага мотакросавага першынства, хаця каб перамагчы там Ціма Гайсэра яго супернікам дапаможа хіба што цуд. У MX2 усё не так адназначна, але і тут лідар чэмпіянату Яга Гіртс сваю перавагу захаваў.

Не маючы колькаснай перавагі перад расійска-фашысцкімі захопнікамі напярэдадні іх уварвання, Украіна мела маральную, а цяпер мае і тэхнічную. Яе мужныя абаронцы сарвалі планы звар’яцелага дыктатара па бліцкрыгу і зганьбілі яго другое ў свеце войска.

Нашу краіну, зрабіўшы яе саўдзельніцай злачынства супраць суседзяў і сяброў, зрабіў тутэйшы дыктатар. Але ён ужо адчуў, чым авантура яго гаспадара абарочваецца ў тым ліку для яго асабіста. Беларусы ні пра што не забыліся і нічога яму не даравалі, таму непазбежная ваенная параза расійскага агрэсара будзе канцом і для яго. Слава Україні! Героям Слава! Верым! Можам! Пераможам! Жыве Беларусь!

Расійскі дыктатар, спрабуючы не дапусціць пашырэння NATO на ўсход, дабіўся, што туды ўступаюць Фінляндыя і Швецыя, якія абедзве дапамагаюць Украіне. А таксама прымаюць у сябе этапы чэмпіянату свету па мотакросе. Першая гэта робіць у гэтыя выхадныя, а другая зрабіла ў мінулыя.

1 620-метровая грунтавая траса ў горадзе Удэвала ўдзельнікам і аматарам MXGP добра вядомая. Вядомы і яе характар, які і наклаў свой адбітак на гонкі ў абедзвюх катэгорыях. Абганяць там складана, і вострай барацьбы за перамогу ні ў адным з заездаў не было. Лідар чэмпіянату ў MX2, гоншчык завадской каманды Monster Energy Yamaha Factory Racing Яга Гіртс, які напярэдадні выйграў кваліфікацыйную гонку, гледзячы па ўсяму, проста не спрабаваў выйграць першую нядзельную ўжо на старце.

У выніку яго галоўны супернік з Red Bull KTM Factory Racing Том Віаль і Кэвін Хоргма з F&H Kawasaki Racing апынуліся наперадзе. Нарвежац выйграў хол-шот, але на першым жа кругу прапусціў наперад француза, а на другім – і бельгійца. Барацьбы за перамогу паміж Томам і Яга не атрымалася. Магчыма, ніхто не хацеў рызыкаваць на падмочанай дажджом трасе, і становішча ў першай тройцы да фінішу так і не змянілася: Віаль атрымаў адмашку клецістым сцягам першым, Гіртс другім, Хоргма трэцім.

Другі заезд быў крыху жывейшым. Хол-шот выйграў гоншчык Red Bull GasGas Factory Racing Сімон Лангенфельдэр. За ім следам размясціліся Хоргма і партнёр Гіртса па камандзе Цібольт Беністан. Француз затым абагнаў Кэвіна, але ўпаў на другім кругу, а нарвежца адцяснілі назад Віаль і Гіртс. Хутка пасля гэтага Яга абагнаў Тома, які затым дапусціў памылку і таксама ўпаў, але без сур’ёзных наступстваў.

З Лангенфельдэрам гоншчыку Ямахі прыйшлося павазіцца падолей. Здавацца немец не збіраўся, і ўтрымліваў першую пазіцыю да адзінаццатага круга, на якім нарэшце саступіў Гіртсу. Відаць, Сімона такая барацьба стаміла, бо Віаля ён прапусціў хутчэй, задаволіўшыся трэцяй пазіцыяй. Том жа да самага фінішу не даваў спакою Яга, але той памылак не дапускаў, і атрымаў перамогу ў гонцы.

Лік у яго з Віалем стаў 1:1, але гэта якраз той выпадак, калі нічыя стала на карысць аднаго з дуэлянтаў. Першая пазіцыя ў другім заездзе прынесла Гіртсу перамогу і па выніках Гран Пры Швецыі. Віаль заняў другое месца, Лангенфельдэр падняўся на ніжнюю ступень подыуму. Першы, другі і трэці яны і ў чэмпіянаце, у якім Яга мае 637 ачкоў, Том 614, а Сімог – 507. Разрыў паміж двума лідарамі ў параўнанні з папярэднім этапам у Бельгіі не змяніўся і складае 23 балы. Сярод вытворцаў у MX2 з 678 ачкамі працягвае лідзіраваць Yamaha, KTM на другой пазіцыі і мае 653 балы, GasGas па-ранейшаму на трэцяй, у яго 562 ачкі.

У старэйшай катэгорыі MXGP Цім Гайсэр поўным ходам імчыцца да чарговага тытулу. Адзін з этапаў ён дакладна можа нават прапусціць, і яго перавага ўсё роўна застанецца значнай. Таму і славенскаму гоншчыку з завадской каманды Honda не абавязкова цяпер перамагаць, што ён рабіць і не асабліва імкнецца.

Напрыклад, у кваліфікацыйным заездзе ён са спакойнай душой даў перамагчы свайму партнёру Мітчэлу Эвансу (не таму, канечне, што выступае ў Формуле Е і змагаецца там за тытул, які ўсё яшчэ можа выйграць заўтра). Развіць поспех у першай гонцы ў нядзелю ў аўстралійца, праўда, не атрымалася – праз падзенне на першых кругах фінішаваў ён толькі дзясятым.

Хол-шот упершыню выйграў гоншчык каманды iXS Hostettler MXGP Team Валенцін Жуйлод, для якога, зрэшты, у далейшым гонка склалася таксама не лепшым чынам – швейцарац скончыў яе толькі дзявятым. Трыа завадской Ямахі ў складзе Максіма Рэно, Джэрэмі Сівера і Глэна Колдэнхофа захапіла тры першыя пазіцыі ў самым пачатку гонкі і ў такім жа парадку ў ёй фінішавала. Гайсэр стаў чацвёртым, чым быў цалкам задаволены.

Другі заезд для Ціма склаўся лепей – ён фінішаваў другім. А вось Рэно не пашанцавала, і ён праз падзенне сышоў з дыстанцыі на першым жа кругу. Сівер пры гэтым выйграў хол-шот, і нікому першую пазіцыю не саступіў да самага фінішу. А вось Гайсэру прыйшлося абганяць Эванса, гоншчыка каманды Gebben Van Venrooy Yamaha Racing Кальвіна ван Влаандэрэна і аднаго са сваіх супернікаў па мінулым сезоне Рамэна Фэвра з Kawasaki Racing Team MXGP. Аднак з гэтай задачай Цім справіўся хутка, апынуўшыся на другой пазіцыі ўжо на першых кругах. Фэвр прапусціў толькі яго і фінішаваў трэцім.

Сівер атрымаў выніковую перамогу на этапе, Гайсэр заняў другое месца, Колдэнхоф замкнуў першую тройку. Пры гэтым швейцарац толькі крыху наблізіўся да славенца ў чэмпіянаце – у іх цяпер 530 і 645 ачкоў адпаведна. Замыкае першую тройку завадскі гоншчык GasGas Хорхе Прада, які мае 496 балаў. У Швецыі ён фінішаваў пятым у першай гонцы і шостым у другой. Yamaha павялічыла свой адрыў ад Хонды ў заліку вытворцаў, які яна ўзначальвае, маючы 668 ачкоў супраць 652. GasGas так нікому і не аддае трэцюю пазіцыю і мае 526 балаў.

Сезон сусветнага мотакросу, як было адзначана вышэй, працягваецца акурат у гэтыя дні ў Фінляндыі на трасе ў Хювінкяа. Чэмпіянат выходзіць на фінішную прамую, і яго вынікі мы падвядзём меней чым праз месяц.

Комментарии

Возможно, ваш комментарий – оскорбительный. Будьте вежливы и соблюдайте правила
  • По дате
  • Лучшие
  • Актуальные