Мем дня: жонка Бекхэма ў дакументалцы хацела схлусіць пра паходжанне з рабочага класу. Дэвід прымусіў сказаць праўду
«На якой машыне цябе вазілі ў школу?»
4 кастрычніка стрымінгавы сэрвіс Netflix выпусціў дакументальны серыял пра зорнага экс-футбаліста зборнай Англіі і «Манчэстэр Юнайтэд», а цяпер аднаго з уласнікаў «Інтэра» Маямі Дэвіда Бекхэма. Стужка складаецца з чатырох эпізодаў, кожны з якіх доўжыцца больш за гадзіну.
У першай серыі, сярод іншага, жонка былога спартсмена Вікторыя распавяла гісторыю знаёмства з Дэвідам.
– Я ўвогуле не люблю футбол! Не любіла тады, не люблю і цяпер. Але я бачыла яго фота ў часопісах, і ён відавочна быў вельмі сімпатычным юнаком. Я хадзіла да яго на гульні не таму, што пераследвала, мне проста хацелася пабачыцца.
Аднойчы я ўбачыла, як пасля матчу футбалісты пайшлі ў бар, а Дэвід размаўляў з бацькамі. Я вельмі блізкая са сваёй сям'ёй, і мне спадабалася гэтая ягоная рыса характару.
Бекхэм жа быў не такі шматслоўным:
– Калі я ўпершыню з ёй загаварыў, я проста закахаўся! – лаканічна распавёў Дэвід.
А далей здарыўся вельмі камічны эпізод: Вікторыя пачала расказваць, што яны з мужам выйшлі з «рабочага класу». Бекхэм, які ў гэты момант знаходзіўся ў іншым пакоі, з'явіўся ў кадры і літаральна прымусіў жонку расказаць праўду.
– Мы абодва былі родам з рабочых сямей, нашыя бацькі працавалі не пакладаючы рук. Мы прадстаўнікі рабочага класу...
– Гавары шчыра! – адкрывае дзверы Бекхэм.
– Я так і раблю!
– Без хлусні.
– Я і так шчырая!
– На якой машыне цябе ў школу вазілі?
– Мой бацька...
– Проста адкажы.
– Мой бацька...
– Што гэта была за машына?
– Тут проста не адкажаш...
– На якой машыне бацька вазіў цябе ў школу?
– Калі як...
– Не!
– Добра, у 80-я ў бацькі быў Rolls-Royce, – здалася Вікторыя.
– Дзякуй, – адказаў задаволены Бекхэм і знік. Жонка жа такім «допытам» відавочна была незадаволеная.
Нагадаем, што Дэвід і Вікторыя ажаніліся 24 гады таму. У шлюбе ў іх нарадзіліся чатыры дзіцяці: сыны Бруклін, Рамэа, Круз і дачка Харпер. Сярэдні сын Бекхэма – Рамэа – таксама стаў футбалістам. Цяпер ён выступае ў другой камадзе «Брентфарда» на пазіцыі форварда.