Самыя прагляданыя клубы Еўропы: немцы ў лідарах, «Барса» ведала лепшыя часы пасля кавіда

Заўзятары – галоўны складнік футбола. А хто іх мае больш за іншых?

Для даследавання былі ўзятыя звесткі сярэдняй наведвальнасці з Transfermarkt па стане на 12 лютага з усіх вышэйшых дывізіёнаў, а таксама другіх дывізіёнаў Англіі, Германіі, Іспаніі, Італіі і Францыі. Адразу падкрэслім, што многія клубы з пераліку (і тыя, хто не трапіў у топ-50) абмежаваныя і памерамі стадыёна – для гэтага мы таксама паказалі, на колькі ў сярэднім заўзятары запаўняюць арэны.

З цікавага:

• «Барусія» Д і «Баварыя» – лідары па наведвальнасці ў Еўропе. Пры гэтым у топ-5 нямецкіх клубаў па наведвальнасці прадстаўнікоў першай Бундэслігі ўсяго тры – акрамя згаданых, гэта таксама «Айнтрахт». Іншыя два – «Шальке» і «Гамбург» з другой Бундэслігі.

• «Інтэр» мае крыху лепшую наведвальнасць, чым «Мілан», прытым, што яны гуляюць на адным стадыёне. Але гэты разрыў не параўнаць з тым, які маюць «Рома» і «Лацыа» на «Алімпіка».

• «Вэст Хэм» – другі па наведвальнасці клуб АПЛ. Не ў апошнюю чаргу дзякуючы таму, што яго «Лондан Стэдыум» – трэці па памерах у лізе (змяшчае крыху больш за «Эмірэйтс»).

• Гэты сезон «Барселоны» праз рэканструкцыю «Камп Ноу» па наведвальнасці даволі сціплы – нават у сезоне 2021/22, калі заўзятараў толькі патроху дапускалі пасля пандэміі, на «сіне-гранатавых» у сярэднім хадзілі 53 тысячы.

• Камбінацыя з няўдалых выступаў «Чэлсі» і памераў стадыёнаў прывяла да таго, што «Сандэрленд» з англійскага Д2 у рэйтынгу вышэй.

• З прыкметных клубаў па-за топ-50 апынуліся «Севілья» (34 901 заўзятар) і «Баер» (29 957). Першыя запаўняюць стадыён усяго на 75% – з цяперашняй формай клуба гэта лагічна. А вось другія – на 99,2% – проста «БайАрэна» змяшчае ўсяго 30 тысяч чалавек.

***

А якія тэндэнцыі на інфаграфіцы цікавыя вам?

Фота: Moritz Mueller/Global Look Press