Мендзілібар развярнуў сезон «Севільі» на 180 градусаў – ад барацьбы за выжыванне ў Ла Лізе да трыумфу ў ЛЕ

Трава зялёная, неба блакітнае, а «Севілья» зноў выйграла Лігу Еўропы. Хаця яшчэ два месяцы таму ў чарговы трыумф андалусійцаў у другім па значнасці еўракубку не верылася. Нават з папраўкай на тое, што яны прысабечылі гэты турнір, выйграўшы яго найбольшую колькасць разоў.

У сакавіку кіраўніцтва «Севільі» вырашыла звольніць галоўнага трэнера Хорхе Сампаолі, таму што вынікі засмучалі. Каманда кацілася ў барацьбу за выжыванне, а на фоне маячыў жалезны вылет з ЛЕ ад фаварыта, якім тады лічыўся «Манчэстэр Юнайтэд».

Так на змену аргенцінцу прыйшоў малавядомы шырокай публіцы і ўзроставы трэнер Хасэ Луіс Мендзілібар, які да таго працаваў пераважна ў ніжэйшых іспанскіх дывізіёнах.

На здзіўленне гэта аказалася геніяльным рашэннем босаў андалусійцаў, таму што Мендзілібар за кароткі час перавярнуў сезон каманды, ператварыўшы яго з правальнага ў трыумфальны.

Некалькі красамоўных фактаў пра 62-гадовага яшчэ ўчора ноўнэйма і пра маштаб яго пакуль самага вялікага дасягненні ў кар'еры.

🔹 Мендзілібар прыйшоў у «Севілью» з «Дэпартыва Алавес», які ў гэтым сезоне прэтэндуе на выхад у Ла Лігу. Гэта быў бы не новы вопыт для Хасэ, які ў сваёй амаль 30-гадовай трэнерскай кар'еры пераважна працаваў у ніжэйшых дывізіёнах (а гульцом і наогул ніколі не выступаў вышэй за Сегунду) і пару разоў змагаўся за павышэнне ў эліту іспанскага чэмпіянату.

У сезоне 2004/05 «Эйбар» з Мендзілібарам на чале фінішаваў усяго ў трох ачках ад зоны выхаду ў Ла Лігу. А вось перад сезонам 2006/07 Хасэ прыйшоў працаваць у «Рэал Вальядалід» і адразу ж выйграў з ім Сегунду. Але перамога на доўгія гады стала адзіным трафеем Хасэ ў карʼеры, аж да ўчорашняга трыумфу.

Што тычыцца выступаў у Ла Лізе, то тут спецыяліст працаваў у асноўным з камандамі другой паловы табліцы – за выключэннем роднага «Атлетыка» гэта «Асасуна», «Леванте» і той жа «Эйбар».

З апошнім Хасэ з другой спробы адпрацаваў яшчэ шэсць гадоў і дамогся як выдатных вынікаў (першы ў гісторыі клуба чвэрцьфінал Кубка Іспаніі, самая высокая пазіцыя ў Ла Лізе за час выступаў – 9-е месца), так і правальных (вылет з эліты).

🔹 Прыход у «Севілью», якая з'яўляецца рэгулярным удзельнікам еўракубкаў, стаўся новым досведам для Мендзілібара. Да гэтага на міжнародным узроўні ён трэніраваў толькі адзін раз.

У сезоне 2005/06 Хасэ ўзначаліў «Атлетык» – любімы клуб з дзяцінства. Дэбютаваць на чале каманды з Більбаа Хасэ выпала як раз у еўракубках. Гэта было супрацьстаянне з румынскім «Клужам» у Кубку Інтэртота, якое Мендзілібар прайграў 0:1.

Такім чынам, аж да гульні супраць «Манчэстэр Юнайтэд» у красавіку гэтага года то быў адзіны еўракубкавы матч у карʼеры іспанскага спецыяліста. Іх падзяляюць 18 гадоў.

🔹 Як бачым, адсутнасць еўракубкавага вопыту не стала праблемай для дасведчанага ў цэлым Мендзілібара. Што даказаў гэты паход з «Севільяй».

На чале андалусійцаў Хасэ перайграў калегаў, для якіх міжнародныя спаборніцтвы даўно перасталі быць чымсьці экстраардынарным. Гэта і Эрык тэн Хаг з «МЮ», і Масімільяна Алегры з «Ювентусу». І ўрэшце фінальны Жазэ Маўрынью, які да сустрэчы з Мендзілібарам ніколі не прайграваў еўракубкавыя фіналы.

🔹 Першы чвэрцьфінал супраць манкуніянцаў наогул можна лічыць сімвалам метамарфозы, якая адбылася з «Севільяй» з прыходам Мендзілібара.

Саступаючы на «Олд Трафард» 0:2 да 84-й хвіліны, андалусійцы змаглі вырваць нічыю дзякуючы познім аўтагалам Маласіі і Магуайра. Гэта быў трэці матч Хасэ на чале каманды, якая ў папярэднім паядынку аналагічным чынам страціла перамогу 2:0 над «Сельтай».

Але больш такіх калатнеч з «Севільяй» Мендзілібара не здаралася. Калі Хасэ ўзначаліў каманду і тая была ўсяго ў двух пунктах ад зоны вылету, то цяпер – за тур да фінішу Ла Лігі – андалусійцы ўжо не баяцца панізіцца ў класе.

Нічога дзіўнага, таму што з Мендзілібарам яны прайгралі толькі два матчы з 16. Гэта былі паядынкі супраць «Жыроны» (0:2) і «Рэала» (1:2).

🔹 На гэтым дасягненні 62-гадовага спецыяліста за два месяцы не сканчаюцца. Услед за выратаваннем ад вылету прыйшоў трыумф у Лізе Еўропы.

За пяць матчаў у турніры Мендзілібар не прайграў ніводнага, а напрыканцы адолеў «Рому» ў фінале ў серыі пенальці. Перамога ў Лізе Еўропы стала сёмай для «Севільі» (што з'яўляецца абнаўленнем уласнага ж рэкорду клуба), а Хасэ яна зрабіла самым узроставым трэнерам – трыумфатарам у гісторыі турніру (пабіў рэкорд Маўрыцыа Сары).

І самае важнае – гэты выйграны фінал азначае ўдзел «Севільі» ў Лізе чэмпіёнаў наступнага сезону. Так андалусійцы замест вылету атрымалі выхад у галоўны турнір Еўропы, у якім Мендзілібар заслужыў дэбютаваць.

🔹 Перад фіналам ЛЕ хаўбек «Севільі» Фернанда паспрабаваў ахарактарызаваць тое, што адбылося з камандай пасля прыходу Хасэ:

«Гэта быў вельмі дзіўны сезон. Мы змагаліся за тое, каб не вылецець у Сегунду, але за два месяцы ўсё змянілася. Цяпер пануе эйфарыя ад магчымасці згуляць у фінале ЛЕ. Галоўны трэнер каманды Хасэ Луіс Мендзілібар заслугоўвае павагі».

А вось словы самога трэнера-геймчэнджэра: «Людзі не чакалі, што мы зробім нешта падобнае, але мы гэтага дасягнулі».

Вось так проста. Часам дастаткова толькі правільна змяніць галоўнага трэнера, і гэты сезон «Севільі» назаўжды стане прыкладам гэтаму.

Фота: IMAGO/Anca Tepei, IMAGO/Andrew Yates/Globallookpress.com, FC Sevilla/Twitter