За штучнае возера Неймара аштрафавалі на 3 мільёны. Павінны былі абмежавацца меншым – але бразілец залез у яго паплаваць

Нэймар працягнуў сваё медыйнае жыццё чарговым скандалам – цяпер ён апынуўся ў полі зроку праваахоўнікаў Бразіліі, якія адказваюць за экалогію. Усё праз штучнае возера, якое пабудавалі на тэрыторыі ягонага маёнтка.

Возера – частка эксклюзіўнага праекта для заможных. За яго Нэймар выплаціў 25 тысяч долараў.

Спачатку пра прадмет скандалу. Возера было пабудавана кампаніяй Genesis Ecossistemas – яна дагэтуль мае ў сваіх сацсетках відэа таго, як яно выглядае:

Такія азёры будуюцца падчас ландшафтнага рэаліці-праекту Genesis Experience мясцовага бізнесоўцы Рыкарда Капаросі. Да 2019 года ён проста займаўся ландшафтным дызайнам, але з 2020 года стаў прапаноўваць «кардынальныя змены» навакольнага асяроддзя ўсяго за 10 дзён, ды яшчэ ў межах рэаліці-шоў. Кампанія не хавае сваёй працы – яна таксама паказала, што агульная плошча возера Неймара складае тысячу квадратных метраў. Яно з'яўляецца чацвёртым з усяго дзесяці запланаваных праектаў і, па звестках Globo, абыйшлося ў 120 000 рэалаў (каля 25 000 долараў).

Спачатку парушэнняў зафіксавалі толькі на 1 млн долараў і забаранілі карыстацца возерам, але Нэймар і гэта парушыў – дасыпалі зверху

22 чэрвеня пасля ананімнай скаргі экалагічны аддзел горада Мангараціба (каля двух гадзін язды ад Рыа-дэ-Жанэйра) наведаў маёнтак Нэймара для экалагічнай інспекцыі. Там выявілі будаўніцтва штучнага возера, перамяшчэнне пяску, камянёў і здабычу вады з мясцовай ракі – усё без ліцэнзіі.

Першапачаткова орган планаваў выпісаць штраф у памеры 5 мільёнаў рэалаў (каля 1 мільёна даляраў). Таксама было забаронена карыстацца возерам і працягваць любыя работы – некаторыя ўчасткі тэрыторыі былі абнесены бар'ернай стужкай.

Аднак інспектарам давялося вярнуцца ўжо 24 чэрвеня – праз здымкі у сацсетках, на якіх відаць, што Нэймар і іншыя напярэдадні карысталіся гэтым самым возерам.

А Genesis Ecossistemas 23 чэрвеня нават выпусцілі рэліз, настойваючы, што яны адпавядаюць бразільскаму заканадаўству:

«Genesis Ecosistemas падкрэслівае сваю поўную прыхільнасць павазе і поўнай адпаведнасці бразільскаму заканадаўству ва ўсёй сваёй дзейнасці. Яна таксама паведамляе, што пакуль не атрымала доступу да нібыта распачатых расследаванняў, а таксама катэгарычна не згодна з навінамі, апублікаванымі на той момант у СМІ, бо яны не адпавядаюць праўдзе.

Нягледзячы на ​​наступствы гэтай навіны, Genesis Ecossistemas удакладняе, што прымае неабходныя меры, каб атрымаць доступ да вышэйзгаданых расследаванняў, і з таго часу прадастаўляе ўсе неабходныя тлумачэнні і інфармацыю. Кампанія Genesis Ecossistemas знаходзіцца ў распараджэнні ўладаў для дапамогі ў праверцы расследуемых фактаў».

Нарэшце, Нэймар быў аштрафаваны на падставе 46-старонкавага пратаколу за:

• ажыццяўленне дзейнасці без належнага кантролю ўздзеяння на навакольнае асяроддзе – 10 мільёнаў рэалаў;

• перамяшчэнне глебы без належнага дазволу – 5 мільёнаў рэалаў;

• перамяшчэнне расліннасці без адпаведнага дазволу – 10 тыс. рэалаў;

• наўмыснае непадпарадкаванне забароне дзейнасці – 1 мільён рэалаў.

У выніку штраф склаў 16 мільёнаў рэалаў, гэта значыць каля 3,3 мільёна долараў.

Нэймар да гэтага часу не плоціць – у яго ёсць 20 дзён на абскарджанне, бацька «замарозіў» пакаранне праз суд

У Нэймайра яшчэ ёсць 20 дзён, каб абскардзіць штраф. Толькі ў выпадку адхілення апеляцыі гулец «ПСЖ» будзе абавязаны выплаціць прызначаны штраф.

Аднак не ўсё так проста – бацька Нэймара паралельна звярнуўся ў суд, каб «вызваліць» возера праз судовую забарону. Аргументам было тое, што, маўляў, усе парушэнні былі адміністрацыйнымі – і не было падстаў уводзіць забарону на выкарыстанне. Суддзя прыняў довады Неймара-старэйшага і прыпыніў дзеянне забароны на выкарыстанне возера да таго часу, пакуль суд не распарадзіцца інакш.

Між тым мясцовая ўлада не збіраецца спыняцца – яна ужо абвясціла, што перадала ўсю інфармацыю ў паліцыю агульнай юрысдыкцыі, паліцыю па ахове навакольнага асяроддзя і пракуратуру.

Фота: Globo