У Паўднёвай Амерыцы праходзіць адбор на ЧС: Б'елса псуе настрой грандам, шчырая рэакцыя бацькі Дыяса на дубль сына
Бразілія прайграла двойчы запар.
Пакуль у Еўропе яшчэ разбіраюцца з тым, хто згуляе на Еўра-2024, у Паўднёвай Амерыцы ўжо прайшло пяць тураў адбору на ЧС-2026. Яшчэ адзiн будзе неўзабаве, потым – паўза да наступнай восенi.
Нагадаем, што з пашырэннем колькасці ўдзельнікаў турніру Паўднёвую Амерыку зараз будзе прадстаўляць 6 зборных, якія выходзяць наўпрост, а яшчэ адна будзе ўдзельнічаць у міжкантынентальным плей-оф.
У апошнім туры прайгралі абодва фаварыты – Аргенціна дома ўляцела 0:2 Уругваю, Бразілія на выездзе прайграла 1:2 Калумбіі.
Турнірная сітуацыя ў адборы выглядае так:
Уругвай Марсела Б'елсы перапыніў кучу гістарычных серый – не без бруду на поле ад абедзвюх каманд
Перамогу Уругваю прынеслі два галы – Рональда Арауха на 41-й і Дарвіна Нуньеса на 87-й.
Агляд матчу:
Не абышлося без звыклага для паўднёваамерыканскага футбола бруду – прычым у выкананні абедзвюх каманд. На 22-й хвіліне, напрыклад, падчас адной са сутычак Энца Фернандэс адштурхнуў Мануэля Угартэ – а той паказаў непрыстойны жэст Радрыга дэ Полю, яшчэ i назваўшы «падсосам Месi». Арбітр не зрэагаваў.
Ліянель Месі пасля матчу сказаў пра гэты эпізод, што «моладзь павінна навучыцца паважаць старэйшых». Хоць да самога Леа таксама ёсць пытанні – ён адштурхнуў Маціяса Олівера локцем, а затым паспрабаваў схапіць яго за шыю. Таксама без пакарання.
Як бы там ні было, а Марсела Б’елса з Уругваем у гэтым адборы ўжо ўстанавiлі некалькі рэкордаў – менавіта гэтай перамогай:
– Уругвай скончыў бяспройгрышную серыю Аргенціны ў адборах на ЧС – 25 матчаў;
– упершыню з 1960-га перамаглі ў адзін каляндарны год і Бразілію (у папярэднім туры 2:0), і Аргенціну;
– у цэлым яны скончылі вочныя бязвыйгрышныя серыі супраць абедзвюх у адборах на ЧС – Бразілію не маглі абыграць 37 матчаў запар, Аргенціну – 25. Гэта былі дзве з трох самых доўгіх такіх серый у паўднёваамерыканскім футболе;
– сталі адзінай зборнай у гісторыі, якой удалося абгуляць Бразілію і Аргенціну ў двух матчах запар тройчы.
Сама ж Аргенціна ўпершыню пасля перамогі на ЧС не змагла перамагчы, забіць і ўтрымаць вароты сухімі. Таксама ўпершыню з мінулага лістапада Месі не змог забіць, выйшаўшы ў аснове зборнай.
Галоўны хайлайт перамогі Бразіліі – радасць бацькі Луіса Дыяса яго дублю
Бразілія ж пасля паразы ад Уругвая прайграла яшчэ i Калумбіі з-за дубля Луіса Дыяса з «Лiверпуля». Гэта, мабыць, самы кранальны сюжэт месяца.
Нагадаем, 28 кастрычніка ў Калумбіі незаконная паўстанцкая група ELN (Армія нацыянальнага вызвалення) выкрала бацькоў футбаліста – іх машыну спынiлi некалькі ўзброеных мужчын. Маці футбаліста вызвалілі ў той жа дзень – а вось бацька прабыў у заложніках 12 дзён. Вызвалілі яго толькі 9 лістапада.
На 75-й і 79-й хвілінах Дыяс вырваў перамогу для Калумбіі – яго бацька глядзеў матч на трыбунах. Яго радасці забітым галам сына не было межаў.
«Думаў пра свайго тату ўвесь час на полі. Ён заўсёды меў правільны менталітэт у цяжкія моманты. Гэтая перамога і галы прысвечаныя яму», – сказаў Дыяс пасля матча.
Фота: скрыншот трансляцыі, beIN SPORTS
