Белінгем – будучы ўладальнік «Залатога мяча». Экс-партнёры скардзяцца на яго, але гэта толькі падкрэслівае яго геніальнасць
Пачытайце пра не па гадах спелую зорку.
France Football абвясціў спіс усіх футбалістаў, якія прэтэндуюць на «Залаты мяч» па выніках мінулага сезона – і ў ім ёсць 20-гадовы Джуд Белінгем. Англiчанiн правёў шыкоўны сезон за дортмундскую «Барусію», аформіў пераход у «Рэал» і ў новым клубе пачаў так, што не снілася і самому Крышу.
Калі не сёлета, то ўжо хуткім часам Белінгем будзе не проста намінантам на «Залаты мяч», а сярод галоўных прэтэндэнтаў на ўзнагароду. Прычын для гэтага ўжо дастаткова.
У мінулым сезоне Белінгем афіцыйна стаў гульцом сусветнага класа. Тады ён уласнаручна цягнуў «Дортмунд», а зараз атрымаў новую ролю ў «Рэале» – і працягвае ззяць
Заўзятары «Дортмунда» дагэтуль вельмі шкадуюць, што Белінгем не змог згуляць у вырашальным матчы з «Майнцам» у апошнім туры Бундэслігі мінулага сезона. Тая сустрэча павінна была прынесці «чорна-жоўтым» доўгачаканае чэмпіёнства, але каманда Эдзіна Тэрзіча расклеілася, згуляла ўнічыю 2:2 страціла салатніцу ў апошні момант.
Праблемы ў тым матчы можна было прадбачыць, але няўдзел у ім Джуда (траўміраваў сваё хранічна хворае калена) пазбаўляла каманду рашэння. У «Барусіі» яшчэ ў першым крузе было дастаткова такіх гульняў, і менавіта англiчанiн быў тым, хто неаднаразова станавіўся месіяй для каманды – то пераможнымі галамі (так было на выездзе з «Айнтрахтам»), то вырашальнымі асістамі (у хатнім матчы з «Аўгсбургам»), ці проста дамінантнай гульнёй у цэнтры поля, якая не дазваляла суперніку будаваць хоць нешта на полі (як, напрыклад, у Берліне ў матчы з «Гертай»).
Сезон-2022/23 афіцыйна зрабіў з Белінгема футбаліста сусветнага класа. У 19 гадоў ён уласнаручна цягнуў каманду і здабываў для яе вынік у вельмі няпростыя часы, неаднаразова быў яе капітанам, у Лізе чэмпіёнаў адзначыўся галамі ў чатырох стартавых паядынках.
У «Дортмундзе» Джуд быў тыповай васьмёркай і выконваў ролю «бокс-ту-бокс», што не перашкодзіла яму дэманстраваць у тым ліку выніковы футбол – за 42 матчы ва ўсіх турнірах ён вызначыўся 14 галамі і 7 выніковымі перадачамі.
Сярод гэтых галоў, напрыклад, былі і такія шэдэўры:
Пераход у мадрыдскі «Рэал» менавіта ўлетку 2023-га – ідэальны таймінг для маладога футбаліста, пра якога гавораць як пра аднаго з найлепшых цэнтральных паўабаронцаў свету.
«Каб дасягнуць высокіх мэт, кожнаму футбалісту павінен дапамагаць чулы трэнер, які можа даць адказы на важныя пытанні: «Што я бачу ў гэтым гульцы?», «Што ён можа прынесці камандзе?», «Калі я аддаю перавагу маладосці над досведам?». Надзвычай дасведчаны Карла Анчалоці знайшоў бы правільныя адказы», – пісаў пра Белінгема ў сваёй калонцы Філіп Лам і фактычна прадказаў фантастычны старт англiчанiна ў новым клубе.
Здавалася б, што яшчэ больш уражлівага можа паказаць неверагодна спелы і разумны не па гадах Джуд, які ўжо замацаваўся і ў зборнай Англіі?
Вопытны Анчалоці, як і казаў Лам, знайшоў правільныя адказы на гэтае пытанне. У новым сезоне «Рэал» Карла гуляе пераважна па схеме 4-3-1-2, у якой Джуду дасталася месца атакуючага хаўбека – адразу за спіной двух цэнтрфорвадаў. І гэта вылілася ў высокую рэзультатыўнасць англiчанiна на старце сезона. Белінгем за чатыры матчы набіў 5 мячоў і адзначыўся 1 асістам. Адразу ў трох гульнях – супраць «Альмерыі», «Сельты» і «Хетафэ» – ён фактычна прынёс сваёй камандзе тры ачкі вырашальнымі дзеяннямі.
Час на адаптацыю ў адным з найвялікшых клубаў у гісторыі? Джуду не трэба.
«Я не быў падчас адаптацыі ў камандзе такіх гульцоў, як Раналду ці Рамас, але з таго часу, як я тут, я ніколі не бачыў такой хуткай адаптацыі, як у Джуда. Не толькі на полі, дзе патрэбныя вельмі высокія вынікі, але і ў распранальні, у адносінах з партнёрамі па камандзе», – распавёў гулец «Рэала» Дані Карвахаль.
Джуд – лідар як на полі, так і ў распранальні, хаця яму ўсё яшчэ 20
Калі вы бачылі хаця б адзін матч з удзелам Белінгема, то дакладна заўважылі, як ён не толькі вельмі ўпэўнена і спрытна працуе з мячом, але і ўвесь час мае зносіны з партнёрамі – падказвае, актыўна жэстыкулюючы, падбадзёрвае, экспрэсіўна дэманструе эмоцыі. Джуд увесь час зараджае фанатаў, просіць ад іх яшчэ больш падтрымкі і дзякуючы гэтаму знаходзіцца ў цэнтры ўвагі.
У дадатак да фенаменальных якасцяў на полі ў Белінгема яшчэ і поўны парадак у галаве. Чыста ў футбольным плане – гэта вялікая перавага над іншымі футбалістамі, якая дазваляе дзейнічаць вольна. Не адзін вялікі футбаліст «выехаў» на ментальнасці пераможцы і праяве лідарскіх якасцяў – усё гэта ў Джуда ёсць, але, напрыклад, у «Дортмундзе» згуляла з ім злы жарт.
У сярэдзіне жніўня з’явілася інфармацыя, што распранальня «Барусіі» зусім не сумуе па англiчанiну – паводле інфармацыі Bild, аднаклубнікам не падабалася, што Джуд прымушаў іх заўсёды ісці да заўзятараў пасля матчаў (нават пасля няўдалых), а таксама адкрыта крытыкаваў на футбольным полі.
Чуткі пацвердзіў новы капітан дортмундцаў Эмрэ Джан:
«Я думаю, што любы трэнер быў бы шчаслівы, калі б Белінгем быў у яго складзе. Але пры гэтым у распранальні маглі б узнікаць праблемы. Ён паказваў, што ён лепш за іншых, але не заўсёды мог даказаць гэта на полі. Аднойчы я сказаў яму, што яго паводзіны непрымальныя. Маладога гульца без вялікіх тытулаў не будуць успрымаць так, як яму хацелася».
У Германіі пасля гэтай інфармацыі з’явілася нямала гарачых абмеркаванняў. Адны заўзятары абараняюць клуб і згаджаюцца, што Белінгем неаднаразова пераходзіў мяжу, іншыя ж крытыкуюць менавіта «Дортмунд» – маўляў, менавіта з-за таго, што ў камандзе мала (а цяпер – няма) такіх футбалістаў, «Барусія» і замацавала за сабой званне «заўсёды другой каманды краіны».
Сам Джуд ад гэтых размоваў ніяк не пацярпеў – ён працягвае быць на полі сапраўдным лідарам і дэманстраваць сваю ўпэўненасць у любых момантах. Як, напрыклад, у яго ўжо фірмовым святкаванні:
Белінгем можа выйграць «Залаты мяч» яшчэ і таму, што эпоха Месі і Раналду заканчваецца
Iснуе яшчэ адна прычына, чаму Белінгем у бліжэйшыя гады можа ўзяць «Залаты мяч».
У эпоху Месі і Раналду нямала футбалістаў прэтэндавалі на самую прэстыжную індывідуальную ўзнагароду, але фактычна не мелі шанцаў супраць пратаганістаў сусветнага футбола, калі яны былі ў сваім прайме. Аргентынец можа забраць «ЗМ» і сёлета, але яго часы, як і часы Крышціяну, сыходзяць у мінулае.
Сярод новых зорак сусветнага футбола і будучых уладальнікаў узнагароды часцей за ўсё ўспамінаюць Эрлінга Холанда і Кіліяна Мбапэ. Але іх цяжка назваць новымі Месі і Раналду – абсалютнымі дамінатарамі ў футболе наўпрост цяпер.
Па стылі гульні і легендарнай пяцёрцы на форме «Рэала» Джуда зараз актыўна параўноўваюць з Зінедзінам Зіданам. Зізу выйграў свой мяч у 26 (яшчэ гульцом «Юве»).
У Белiнгема дакладна яшчэ ёсць час.
Фота: Joachim Bywaletz/DeFodi Images/Global Look Press, Diego Souto/REUTERS, Joe Prior/Visionhaus