«Аякс» у агоніі – толькі адна перамога ў чэмпіянаце, зона вылету і «гаўняныя» футбалісты ў складзе

Зірніце на турнірную табліцу чэмпіянату Нідэрландаў.

Знайшлі «Аякс»? А калі праскроліць ніжэй?

Так, вам не падалося – самы тытулаваны клуб, футбольны твар краіны перажывае вельмі няпростыя часы і сёння знаходзіцца ў зоне вылету.

Праблемы «Аякса» пачаліся яшчэ ў мінулым сезоне – каманда цяжка перажыла сыход тэн Хага

Да сезону 2022/23 «Аякс» падыходзіў з трыма чэмпіёнскімі тытуламі запар, але ўжо без Эрыка тэн Хага і некалькіх важных футбалістаў – Лісандра Марцінеса і Антані нідэрландзец забраў з сабой у «Манчэстэр Юнайтэд», а Себасцьян Алер і Раян Гравенберх выправіліся ў Бундэслігу.

Амстэрдамцы, здавалася, не разгубіліся – прызначылі жаданага кандыдата Алфрэда Схройдэра новым галоўным трэнерам і накупілі новых гульцоў больш як на 100 млн эўра.

За выключэннем матчу на Суперкубак Нідэрландаў, Схройдэр ударна стартаваў у новым сезоне. «Аякс» перамог у сямі матчах запар, але пасля страціў стабільнасць – сур’ёзнымі ўдарамі па рэпутацыі трэнера сталі хатнія 1:6 ад «Напалі» і 0:3 ад «Ліверпуля» ў Лізе чэмпіёнаў, а канчаткова дабілі кіраўніцтва шэсць (!) нічыіх запар у Эрэдывізі.

Схройдэра звольнілі ў канцы студзеня, а каманду экстрана ўзначаліў Джоні Хейтынга (зноў). Галандзец, які згуляў за аяксідаў больш за 200 матчаў футбалістам, змог выратаваць сезон – амстэрдамцы вылецелі ад берлінскага «Уніяна» ўжо на першай стадыі плэй-оф Лігі Еўропы, але фінішавалі трэцімі ў чэмпіянаце і гулялі ў фінале нацыянальнага Кубка (праўда, саступілі ПСВ у серыі пенальці).

Было зразумела, што Хейтынга ўзначаліў каманду толькі да завяршэння сезона - «Аякс» шукаў новага трэнера. Чуткі звязвалі амстэрдамцаў з вяртаннем Петэра Боса (у выніку падпісаў кантракт з ПСВ), але да канкрэтыкі дайшло з Морысам Стэйнам, чыя ратэрдамская «Спарта» сенсацыйна заскочыла на шостае месца ў мінулым сезоне.

Здавалася, усе праблемы ў мінулым, і «Аякс» усё пачынае з нуля. Але сітуацыя толькі пагоршылася.

«Аякс» хаатычна правёў лета – новы спартыўны дырэктар накупіў больш чым на 100 млн еўра, уляпаўся ў скандал і быў звольнены

Як і кожны год, улетку «Аякс» зладзіў распродаж ключавых выканаўцаў. Так, Эдсан Альварэс і Махамед Кудус з’ехалі ў «Вест Хэм», Юрыен Тымбер – у «Арсенал», Келвін Басі – у «Фулхэм» (усе – за вялікія грошы), а Дэві Класэн і Душан Тадзіч сышлі вольнымі агентамі.

Але продаж гульцоў – гэта яшчэ паўбяды. Амстэрдамцы заўсёды ўмелі за адносна невялікія грошы знаходзіць на рынку новых маладых і здольных футбалістаў, якія маглі даваць вынік тут і цяпер. Аднак трансферная кампанія «Аякса» летам 2023-га да гэтага часу выклікае ў мясцовых фанатаў нямала пытанняў.

У траўні клуб прызначыў вядомага па дортмундскай «Барусіі» і «Арсеналу» Свена Міслінтата на пасаду тэхнічнага дырэктара (фактычна, спартыўнага дырэктара), які адказваў за летнюю трансферную кампанію. У ягонае першае трансфернае акно ў Амстэрдаме клуб падпісаў адразу 12 навічкоў, але больш за ўсё размоў было вакол Борны Сосы са «Штутгарта» (клуба, у якім Міслінтат працаваў да прызначэння ў «Аякс»).

Інтарэсы харвата прадстаўляе агенцтва AKA Global, якое валодае 3% акцый футбольнай аналітычнай кампаніі Matchmetrics GmbH, галоўным акцыянерам якой з’яўляецца сам Міслінтат. Нідэрландскія СМІ звярнулі ўвагу на занадта шмат падазроных фактаў і пачалі расследаванне, каб праверыць, ці не зарабіў немец на трансферы «старога знаёмага» Сосы («Аякс» заплаціў за Борну 8 млн еўра).

У Міслінтата былі праблемы і са Стэйнам (пагаворваюць, праз рознагалоссі ў поглядах на трансферную кампанію). Хадзілі чуткі, што Міслінтат прама на трэнаваннях настройваў гульцоў супраць трэнера і «тапіў» за яго звальненне, але ў выніку звольнілі менавіта Міслінтата – ён адпрацаваў у Амстэрдаме ўсяго 4 месяцы.

Немец застаўся без працы не толькі праз расследаванне, але і праз шэраг няўдалых трансферных рашэнняў. «Аякс» выдаткаваў амаль 30 млн еўра на двух новых цэнтрфорвардаў (адзін з іх – 27-гадовы Чуба Акпом з «Мідлзбра»), хоць у старце працягвае гуляць Браян Бробі. Таксама амстэрдамцы набылі ў «Антверпена» левага абаронцу Гастана Авілу за 12,5 млн еўра, аддаўшы ў бельгійскі клуб асноўнага ў мінулым сезоне Оўэна Вейндала.

Так, большасць навічкоў нідэрландскага гранда – юнакі з вялізным патэнцыялам, але беспарадак у камандзе і ў клубе ў цэлым наўрад ці дапамагае гэты патэнцыял рэалізаваць.

Падазраюць, што Душан Тадзіч сышоў з «Аякса» сам, бо быў незадаволены трансфернай кампаніяй, а легендарны Рафаэль ван дэр Варт пасля чарговай паразы амстэрдамцаў заявіў: «Мне шкада Стэйна, у яго проста гуляюць гаўняныя футбалісты».

Усе праблемы выліліся ў вынікі «Аякса» – толькі 1 перамога ў чэмпіянаце, зона вылету, забітых мячоў менш, чым прапушчаных.

Што б там ні адбывалася за кулісамі, заўзятараў найперш цікавяць футбол і вынікі, але з імі усё катастрафічна.

Галоўныя факты пра сезон «Аякса»:

– Толькі 1 перамога ў 7 матчах чэмпіянату (дзве – ва ўсіх турнірах);

– 17-е месца ў Эрэдывізі;

– Прапушчаных галоў (16) больш, чым забітых (11);

– Пякельна саступілі леташняму чэмпіёну «Феенорду» 0:4 удома;

– Адстаюць ад першага месца на 22 пункты;

– Не перамагаюць ужо 8 матчаў запар;

– Найгоршы старт у гісторыі клуба.

У наступных двух матчах «Аякс» на выездзе згуляе спачатку з «Брайтанам», а затым з ПСВ, які лідаруе ў чэмпіянаце. Пасля паразы 3:4 ад «Утрэхта» ў мінулым туры Стэйна спыталі, што станоўчага ён убачыў у гульні каманды, што магло б дадаць аптымізму перад цяжкімі выездамі, а ён адказаў: «Эээм… Тры галы і тое, як каманда змагалася»

Заўзятары ўзбунтаваліся супраць трэнера і некалькі тыдняў патрабавалі ягонай адстаўкі – і нарэшце атрымалі добрыя навіны. У панядзелак амстэрдамцы афіцыйна аб’явілі аб спыненні супрацы з трэнерам, які ўзначальваў каманду на працягу ўсяго 10 матчаў.

«Я спрабаваў зрабіць усё магчымае, каб вярнуць каманду туды, дзе ёй і месца, але я праваліўся», – прызнаўся Стэйн пасля звальнення.

***

Паводле інфармацыі Фабрыцыа Рамана, у бліжэйшы час камандай будзе кіраваць экс-гулец «Аякса» Хэдвігес Мадура, які быў памочнікам Стэйна з пачатку сезона, аднак клуб шукае варыянты з доўгатэрміновай перспектывай (прынамсі, да завяршэння бягучай кампаніі).

Прыярытэтная опцыя па стане на сёння – Джон ван'т Схіп, легендарны ў мінулым гулец амстэрдамцаў.

Фота: Rene Nijhuis/BSR Agency, Tom Weller/picture alliance/Global Look Press, AFC Ajax