Цяпер у вялікім футболе два Мбапэ – 16-гадовы Этан дэбютаваў у дзень нараджэння брата.
А Кіліян яшчэ і дубль зрабіў – ідэальны вечар.
Увечары 20 снежня «ПСЖ» завяршыў праграму гульняў на 2023 год. На «Парк дэ Прэнс» галоўны клуб Францыі спакойна абгуляў «Мец» 3:1. Перамога дазволіла парыжанам пайсці на перапынак (вернуцца 3 студзеня матчам за Суперкубак супраць «Тулузы») лідарам турнірнай табліцы. «ПСЖ» апярэджвае «Ніцу», якая ідзе другой, на пяць пунктаў.
Галоўным героем сустрэчы стаў Кіліян Мбапэ (як нечакана), які ў гэты дзень адзначаў 25-годдзе. Французскі форвард зрабіў усё, каб парадаваць не толькі сябе, але і каманду.
На 60-й хвіліне Кіліян цудоўным абводным ударам зрабіў лік 2:0 на карысць «ПСЖ». Майстэрскае выкананне.
Гэты гол быў вельмі дарэчы, бо ўжо праз 12 хвілін госці адгулялі адзін мяч. Каб супакоіць сітуацыю, на 83-й Мбапэ скарыстаўся памылкай абаронцы «Меца», які аддаў на свайго варатара. Кіліян здзейсніў перахоп і ўстанавіў лік 3:1.
Спакойны адрыў дазволіў Луісу Энрыке зрабіць галоўнай зорцы каманды падарунак. На 90+2-й на поле выйшаў 16-гадовы Этан Мбапэ – родны брат Кіліяна. Гэта дэбют юнака за «ПСЖ» і ў дарослым футболе ўвогуле.
Паглядзіце, як за гэтым назірала сямёрка парыжан і сям’я хлопцаў на трыбунах.
Вядома, за адведзены час Этан наўрад ці мог выдаць феерыю, але вось вам першая статыстыка брата зоркі:
🔷 9 дотыкаў;
🔷 100% дакладных перадач (9/9);
🔷 1 перадача ў фінальную траціну.
Пасля матча Кіліян асабіста павіншаваў брата.
А потым, трымаючыся за рукі з Этанам, падышоў да трыбунаў з камандай.
Разам яны пайшлі і на пасляматчавае інтэрв'ю, дзе з мікрафонам стаяў іх аднаклубнік Прэснель Кімпембэ, які цяпер залечвае траўму.
«Я шчаслівы. Этану спадабалася, але яшчэ больш спадабалася мне – як старэйшаму брату. Я не думаў, што мне давядзецца перажыць такі асаблівы дзень, і гэты матч – тое, што я сапраўды заўсёды буду памятаць. Дэбют Этана – самае важнае для мяне, хоць і перамога таксама важная», – сказаў Кіліян.
Этан гуляе ў сярэдзіне поля – можа цэнтральнага паўабаронцу, можа апорніка. Таму чакаць ад яго галявых рэкордаў, якія ставіць брат, сапраўды не варта. У гэтым сезоне ён выступаў толькі за моладзевую каманду Парыжа. І нядрэнна – 3+2 за 18 матчаў у чэмпіянаце і юнацкай Лізе чэмпіёнаў.
Цікава, што менавіта Этан – аўтар вядомага святкавання галоў Кіліяна. Пра гэта расказаў сам форвард:
«Гэта пачалося з Playstation. Этан забіў гол і адсвяткаваў яго гэтым жэстам. Праз пяць хвілін ён паставіў у гульні паўзу і папрасіў мяне прадэманстраваць гэта пасля забітага мяча ў рэальнай гульні.
Наступны гол я забіў „Барусіі“ ў Дортмундзе і выканаў абяцанне, Этан быў шчаслівы. Я сказаў яму: «Цяпер гэта мой жэст, я скраў яго ў цябе».
За першую каманду „ПСЖ“ Мбапэ-малодшы таксама ўжо гуляў, але толькі ў таварыскіх матчах. Улетку выходзіў супраць „Гаўра“, „Аль-Насра“ і „Чанбука“. Што цікава – тады ён не перасякаўся са сваім братам на поле – у Кіліяна якраз быў канфлікт з кіраўніцтвам, якое патрабавала ад гульца падаўжэння кантракту ці трансферу з клуба.
Магчыма, Этан і Кіліян згуляюць не так шмат матчаў за «ПСЖ» побач адзін з адным, бо будучыня форварда ў Парыжы пад сумневам. Хоць «Рэал» патрабуе ад Мбапэ пэўнасці і ўжо гатовы адмовіцца ад трансферу, калі Кіліян будзе цягнуць час. Але ў любым выпадку то быў гістарычны вечар для іх сям'і.
Фота: Global Look Press, скрыншоты MEGOGO