Што за варатар, які выратаваў голам «Лацыа» ў ЛЧ: рускія карані, падтрымка Пуціна і футболка «Спыніце вайну»

Дзень старту Лігі чэмпіёнаў падарыў заўзятарам, магчыма, найлепшы гульнявы момант гэтага года. Напрыканцы матча паміж «Лацыа» і «Атлетыка» (калі лік быў 1:0 на карысць мадрыдскай каманды) італьянцы ўсім складам пайшлі на палову саперніка пры выкананні вуглавога. У штрафную пабег і варатар Іван Праведзель. І менавіта ён зрабіў лік 1:1.

ВІДЭА

Для тых, хто не вельмі цікавіцца італьянскім чэмпіянатам, дзе ўжо 10 гадоў гуляе Праведзель, яго імя не вельмі знаёмае. Аднак у Расіі аматары футбола куды лепш ведаюць гэтага варатара, бо Іван мае рускія карані.

Маці гульца «Лацыа» нарадзілася ў Маскве, сам ён валодае рускай мовай, у тым ліку і праз тое, што ў дзяцінстве ездзіў у Расію да бабулі. А дзед Праведзеля, як расказвае сам Іван, быў знаёмы з Львом Яшыным. «Не ведаю гісторыю іх адносін, але для мяне гэта яшчэ адна прычына верыць у сваю мару стаць класным варатаром. Прыклады такіх людзей натхняюць!» – казаў футбаліст італьянскай каманды.

Праведзель з дзяцінства хацеў стаць менавіта варатаром. На гэта яго натхніла гульня Франчэска Тольда ў паўфінале Еўра-2000 супраць Нідэрландаў, калі італьянец выцягнуў сваю зборную ў фінал. Тады Івану было 6 гадоў.

Але хлопца заўсёды бачылі нападаючым: «Нават не ведаю чаму. Дарэчы, я быў не такім дрэнным! Да 15 гадоў гуляў у атацы, але зразумеў, што гэта проста не дастаўляе мне задавальнення. Тады я паспрабаваў сябе варатаром у маленькай камандзе, і ў мяне стала атрымлівацца. Потым мяне заўважыў «Удынезэ» – так я і стаў варатаром ужо паўнавартасна».

Верагодна, мінулы досвед нападаючага дапамагае Праведзелю, бо цяпер быў не першы гол італьянца. Раней ён ужо забіваў: у лютым 2020 года ў Серыі В за «Юве Стабію» таксама галавой і таксама на 90+5-й хвіліне.

ВІДЭА

Гулец часта адзначаў, што хаця і вырас у Італіі, але адчувае сябе напалову рускім. У сваім профілі ў Instagram гулец падкрэслівае свае карані: сцяг Расіі ў апісанні профілю і фотаздымкі на фоне Крамля з 2015 і 2017 гадоў.

А за два дні да поўнамаштабнага ўварвання Расіі ва Украіну Праведзель даў інтэрв'ю «Чэмпіянату», у якім сказаў, што меў бы за гонар выклік у расійскую зборную (але ўвосень 2022-га Раберта Манчыні выклікаў Івана ў італьянскую)

А таксама ў тым інтэрв'ю выказаўся ў падтрымку Уладзіміра Пуціна:

«Пуцін стаіць на чале такой вялізнай дзяржавы, як Расія, ён моцная асоба. Калі бачыш Пуціна, адчуваеш, які вялікі аўтарытэт ён мае ў свеце».

Але праз тыдзень, калі ўжо пачаўся наступ Расіі на Украіну, гульца перад матчам «Спецыі», за якую ён тады выступаў, можна было ўбачыць у цішотцы «Спыніце вайну». Пасля варатар з рускімі каранямі публічна ніяк не каментаваў тое, што адбываецца ва Украіне.