«Крумкачы» прабіліся ў фінальны этап Д3. У вырашальным матчы было 6 галоў, а заўзятараў – больш, чым на некаторых гульнях вышэйшай лігі
Перамога сапраўды народнай каманды
У суботу НФК «Крумкачы» сустракаліся з «Юні Мінск». Гэта быў заключны матч рэгіянальнага этапу другой лігі. «Крумкачы» з 32 ачкамі ішлі на другім радку (які дазваляе прайсці ў наступны раўнд), а «Юні» – на трэцім (з 30 ачкамі).
У першым коле рэгулярнага сезона «Крумкачы» набралі за 8 матчаў усяго 13 ачкоў (4 перамогі, 1 нічыя і 3 паражэнні). Тады народная каманда саступіла «Юні» 2:5 і пачала губляць надзею на паўтор выніку мінулага года (другое месца ў цэлым Д3). Але перад другім колам «Крумкачы» ўзмацніліся і выдалі бяспройгрышную серыю з 7 матчаў (6 перамог і 1 нічыя).
Цяпер экс-клубу Аляксандра Івуліна хапала б для выхаду ў фінальны этап нічыёй, але са старту падапечныя Сяргея Казекі вырашылі змагацца за перамогу. Першы гол заўзятары ўбачылі ўжо на другой хвіліне.
Але за першы тайм «Юні» паспеў зрабіць лік 1:1 – скарысталіся памылкай абаронцы.
Другі тайм таксама пачаўся з хуткага гола «Крумкачоў».
А праз 17 хвілін «Юні» прапусціў і трэці мяч.
За 10 хвілін да канца асноўнага часу «Крумкачы» канчаткова вырашылі, хто пераможа і пакрочыць у наступны раўнд другой лігі.
Аднак футбалісты «Юні» са штрафнога паспелі трохі скараціць адставанне.
Па ходзе гульні ўзнікалі сутычкі паміж футбалістамі. Дзесьці суддзя паказваў карткі за неспартыўныя паводзіны, дзесьці – стрымліваўся.
Але ж вынік застаўся нязменным – «Крумкачы» ўпэўнена перамаглі, і дапамаглі ім у гэтым заўзятары. Проста паглядзіце, якая падтрымка была на стадыёне РЦАР-БДУ! Столькі заўзятараў не могуць сабраць і некаторыя клубы Д1.
Далей мінскую каманду чакае фінальны этап. Ён будзе складацца з наступных стадый: групавы этап (4 групы па 4 каманды, адно кола па прынцыпе «кожны з кожным»), чвэрцьфіналы, вызначэнне выніковых месцаў з пятага па восьмае, паўфіналы, матч за трэцяе месца і фінал.
Фота і відэа: НФК «Крумкачы»