Спартсмены з Беларусі могуць паехаць на Азіяцкія гульні. Тлумачым, што адбываецца, але супраца наспявае дзіўная

У мінулую сераду Міжнародны алімпійскі камітэт выпусціў заяву, у якой падтрымаў Украіну і санкцыі супраць Беларусі і Расіі. Але ёсць у дакуменце і сёе-тое іншае. На фоне заклікаў да ўзмацнення абмежаванняў можна ўбачыць і радкі з прапановай дапусціць да міжнародных спаборніцтваў у нейтральным статусе спартсменаў з Беларусі і Расіі, калі яны не падтрымлівалі вайну ва Украіне. Пазней МАК паставіў у прыклад тэніс (і нядаўні Australian Open у прыватнасці), дзе беларусы і расіяне выступаюць пад белымі сцягамі.

Заяву МАК з радасцю прынялі ў нацыянальных алімпійскіх камітэтах Беларусі і Расіі, адзначыўшы, што чакаюць "канкрэтных рашэнняў" ад міжнароднай арганізацыі. Украінскі бок чакана адмоўна зрэагаваў на падобную навіну. Прэзідэнт Уладзімір Зяленскі даслаў лісты кіраўнікам вядучых міжнародных федэрацый з просьбай вызначыцца адносна заявы МАК, а таксама запрасіў кіраўніка МАК Томаса Баха ў Бахмут, каб той пераканаўся, што нейтральнасці не існуе.

Неўзабаве на радасць спартовых функцыянераў Беларусі і Расіі сталі з'яўляцца і "канкрэтныя рашэнні". У нядзелю выканальнік абавязкаў прэзідэнта Алімпійскай рады Азіі (АРА) Рандхір Сінгх у інтэрв'ю адной з найбуйных індыйскіх газет распавёў, што беларускіх і расійскіх спартсменаў могуць дапусціць на летнія Азіяцкія гульні. Свой намер арганізацыя абгрунтоўвае "прынцыпамі, паводле якіх спорт з'яўляецца аб'яднаўчай сілай".

«Ідэя складаецца ў тым, каб даць спартсменам магчымасць удзельнічаць у Алімпійскіх гульнях-2024. Спорт не месца для палітыкі. Спорт для спартсменаў: для любові, сяброўства і братэрства. Спартсмены - адна сям'я. Зыходзячы з гэтага, мы падтрымліваем іх», - заявіў Сінгх.

Што такое Азіяцкія гульні

Азіяцкія гульні (АГ) з'яўляюцца нечым накшталт Алімпіяды, але толькі для краін Азіі. Упершыню летнія АГ правялі ў 1951-м і з тых часоў ладзяць кожныя чатыры гады. У 1986-м да іх дадалі зімовыя АГ. Пазней з'явіліся Азіяцкія гульні ў памяшканнях і пляжныя Азіяцкія гульні.

Бліжэйшыя летнія АГ пройдуць з 23 верасня па 8 кастрычніка 2023 года ў кітайскім Ханчжоу. Першапачаткова Гульні планаваліся на 2022-гі, аднак чарговая кавідная хваля перанесла іх на год пазней. У Ханчжоў чакаюць спартсменаў з 45 азіяцкіх дзяржаў. Усяго плануецца правесці спаборніцтвы па 61 дысцыпліне, сярод якіх даволі экзатычныя для Беларусі аквабайк, брыдж, курэш (разнавіднасць барацьбы), сілат (адзінаборства), сепактакрау (малайскі валейбол, дзе мяч перапраўляецца над сеткай нагамі), кабадзі (камандная гульня, сумесь барацьбы і пятнашак) і спідскейтынг (выгляд ролер-спорту).

На якіх умовах могуць дапусціць беларусаў

Усё ідзе да таго, што прадстаўнікоў Беларусі ў дзіўных відах мы не ўбачым. Па словах Сінгха, беларускіх і расейскіх спартсменаў могуць дапусціць толькі туды, дзе разыгрываюцца алімпійскія ліцэнзіі на Парыж-2024. Пры гэтым еўрапейцы не змогуць разлічваць на азіяцкія квоты, а адбірацца будуць асобна. Таксама беларусы і расіяне не змогуць прэтэндаваць на медалі Азіяцкіх гульняў, але не выключана, што спартсменаў будуць узнагароджваць нейкім іншым чынам.

Распрацоўкай кваліфікацыйнай схемы займаюцца супрацоўнікі АРА, МАК і прадстаўнікі міжнародных федэрацый. Па ходзе падрыхтоўкі ўсплываюць праблемы. Больш за ўсё ў АРА заклапаціліся алімпійскім адборам для азіяцкіх спартсменаў. Для навочнасці возьмем спаборніцтвы ў боксе. Дапусцім, у першым баю топавы па мерках Азіі баксёр саступае ўмоўнаму расіяніну, а значыць, страціць шанцы не толькі пазмагацца за медалі АГ, але і адабрацца ў Парыж-2024. Таму ўсё ідзе да таго, што ў спаборніцтвах, дзе змаганне ідзе на выбыванне, беларусаў і расіян не будзе.

Іншая справа дысцыпліны, дзе размеркаванне месцаў адбываецца дзякуючы паказанаму часу ці набраным балам. Тут еўрапейцы ніяк не перашкодзяць азіятам размяркоўваць паміж сабой медалі і алімпійскія квоты. Чакаецца, што АРА прыме рашэнне пра допуск спартсменаў з Беларусі і Расіі менавіта ў такіх відах, як, напрыклад, лёгкая атлетыка, гімнастыка або веславанне.

Не выключана, што беларусам і расіянам нават дазволяць выступаць у Ханчжоу пад сваімі дзяржаўнымі сцягамі. Рашэнне наконт гэтага будзе прымаць МАК. Акрамя гэтага ўсіх патэнцыйных удзельнікаў АГ ад дзвюх краін чакаюць абавязковыя тэсты на допінг.

На самай справе Азіяцкія гульні будуць адзіным шанцам для беларусаў дабрацца да Алімпіяды-2024. На іншых міжнародных спаборніцтвах, дзе можна прэтэндаваць на Парыж, спартсмены застаюцца пад банкам, а вынікі, паказаныя на нацыянальных спаборніцтвах, не прызнаюцца міжнароднымі федэрацыямі.

Таксама Сінгх не выключыў, што беларусы і расіяне будуць запрошаныя на іншыя кантынентальныя турніры. АРА разлічвае, што гэта ўзніме агульны ўзровень спаборніцтваў і цікавасць да іх з боку новых спонсараў і тэлеканалаў.

Украіна можа байкатаваць Парыж-2024

Пасля заяў МАК Нацыянальны алімпійскі камітэт Украіны запланаваў на 3 лютага правядзенне пазачарговай Генеральнай асамблеі. Адпаведныя лісты прыйшлі ўжо ў нацыянальныя федэрацыі. У ходзе пасяджэння абмяркуюць пытанне магчымага байкоту Украінай Алімпіяды-2024 праз допуск туды спартсменаў з Беларусі і Расіі незалежна ад статусу.

Украінскі істэблішмент падтрымлівае пазіцыю НАК.

"МАК - прамоўтэр вайны, забойстваў і разбурэнняў... МАК з задавальненнем глядзіць на тое, як Расія знішчае Украіну, а затым прапануе Расіі трыбуну для рэкламы генацыду і заахвочвае далейшыя забойствы", - на днях заявіў кіраўнік Офіса прэзідэнта Украіны Міхаіл Падаляк.