У Беларусі гэты ўкраінец быў гатовы назаўжды падпісацца з «Крумкачамі» і здаў матч, а цяпер на Радзіме робіць прыгажосць у міноры
Жартуюць, што ў яго ўсяліўся Месі.
Ураджэнец Луганску Яраслаў Багуноў у свой час даволі яскрава праяўляў сябе ў чэмпіянаце Беларусі. Агулам вінгер правёў у нашай краіне шэсць гадоў (і нават атрымаў від на жыхарства), паспеўшы пагуляць за «Белшыну», «Нафтан» і «Крумкачы» (больш за 80 матчаў у вышэйшым дывізіёне). Праўда, галоўным успамінам пра сябе Багуноў пакінуў не экстравагантную прычоску, не гатоўнасць падпісаць з «крумкачамі» пажыццёвы кантракт і нават не гол праз сябе ў апошнім туры чэмпіянату-2017 (адзнака 2:42).
Праз год пасля адʼезду з Беларусі ў 2019-м украінцу прыляцела за ўдзел у дамоўных матчах. Высветлілася, што Багуноў у 2017-м у абмен на 900 еўра пагадзіўся паўплываць на вынік матчу з брэсцкім «Дынама», і за гэта яму ФІФА выпісала двухгадовы бан у прафесійным футболе.
Цікава, што з першалігавых «Крумкачоў» у 2019-м Багуноў зʼехаў ва УПЛ, дзе да Беларусі быў не патрэбны, – гулец тады спадабаўся «Львову». На захадзе Украіны хаўбек і гуляў аж да дыскваліфікацыі. Адбыўшы пакаранне, ён паўгода правёў у Д2, пасля чаго вярнуўся ў «Львоў», прычым на той момант клуб трэнаваў беларускі спецыяліст Алег Дулуб.
- Ініцыятыва па падпісанні Багунова зыходзіла ад кіраўніцтва клуба. Мяне запэўнілі, што ў Беларусі ён стаў проста ахвярай абставінаў, раскаяўся і гэтак далей. Паглядзеў на футбаліста на трэнаваннях, у справе, зразумеў, што, у прынцыпе, нядрэнны выканаўца, таму павінен нам дапамагчы. Плюс у нас быў дэфіцыт гульцоў, мяне на зборах у Турцыі нават крыху патрэсвала ад думкі, што футбалістаў у калектыве недастаткова для паўнавартаснага выступу ў сезоне. Але кіраўнікі запэўнівалі, што ўсё будзе добра. Прыехалі новыя гульцы, у тым ліку Багуноў. У спарынгах ён глядзеўся нядрэнна, фізічна быў гатовы, таму вырашыў узяць яго. У прынцыпе, атрымалася нядрэнна, – успамінаў Дулуб.
Праўда, пад кіраўніцтвам трэнера з Беларусі Багуноў паспеў правесці толькі тры афіцыйныя сустрэчы, у якіх адзначыўся голам і асістам – неўзабаве пасля зімовай паўзы сезона-2022/23 Дулуба адправілі ў адстаўку.
На зборах у Турцыі ў лютым гэтага года Багуноў быў у ліку гульцоў «Львова», якія здымалі сцяг Расіі, што вісеў побач з гатэлем каманды. А ў інтэрвʼю клубнай прэс-службе футбаліст прызнаваўся, што ўсе родныя выехалі з Луганску ў Кіеў, бо «гэта ўжо не той Луганск, што быў раней». Сам Яраслаў марыць вярнуцца ў родны горад, але ў такі, дзе не будзе ні акупантаў, ні тых, «хто пераабуўся».
Цяпер Багуноў выступае ва ўкраінскім Д2 за клуб «Інгулец», які пакінуў элітны дывізіён па выніках мінулага сезону. Клуб з пасёлка Пятрова Крыварожскай вобласці ідзе ў лідарах чэмпіянату, у 10 матчах маючы 9 перамог. Багуноў – адна з галоўных дзейных асоб у «Інгульцы»: у 9 гульнях (прапусціў першы тур) забіў 4 мячы. Прыгожым выйшаў гол 30-гадовага вінгера ў нядаўнім матчы супраць «Палтавы» (3:1). Багуноў, актыўна выкарыстоўваючы падманныя рухі, прасунуўся з флангу ў цэнтр, абгуляў абаронцу і прабіў у ніжні кут брамы. За 10 хвілін да гэтага ў падобнай манеры экс-гулец ЧБ зарабіў пенальці (адзнака 4:39). Ва ўкраінскіх медыя ўжо жартуюць, што ў футбаліста ўсяліўся Месі.
Таксама варта адзначыць, што першы гол «Інгульца» у матчы на рахунку яшчэ аднаго былога гульца вышэйшай лігі Юрыя Казырэнкі, які паўтара года выступаў за «Іслач». Яго галявы ўдар таксама атрымаўся прыгожым – хаўбек з-за межаў штрафной дакладна трапіў у верхні кут брамы «Палтавы» (адзнака 2:50).
