Лімітчыкі «Дынама» Мінск, дагестанскі брат, гульцы з Д4 – яны аблажалілся з Фарэрамі
Уляпаліся ў гісторыю.
7 верасня моладзевая зборная Беларусі напэўна збіралася ўпершыню выйграць у адборы да Еўра-2025. Аднак матч у Арменіі завяршыўся перамогай Фарэрскіх астравоў, якія вялі 3:0, а потым прапусцілі толькі двойчы.
Чым апраўдвацца Сяргею Ясінскаму, пад кіраваннем якога раней не змаглі за два матчы абгуляць Андору? Тэмпература +35 не пасуе – фарэрцам прывыкнуць да такога напэўна было складаней, чым беларусам. Можна казаць пра нешанцаванне ў атацы – «Прэсбол» налічыў 26:5 па ўдарах, было чатыры трапленні ў каркас фарэрскай брамы, – але гэты метад Ясінскі ўжо выкарыстаў пасля першай нічыі з андорцамі (там было тры штангі), ды і трох прапушчаных гэта ніяк не тлумачыць. Хоць гэта белфутбол – мяркуючы па тым, колькі не звальнялі Георгія Кандрацьева, трэнер моладзі можа застацца на пасадзе, склаўшы якую-небудзь мудрагелістую справаздачу.
Хто ж уляпаўся ў гісторыю белфутбола як тыя, хто даў забіць тры фарэрскай «маладзёжцы», у якой такога не здаралася з 2020-га?
Ніводнага сэйва за гульню (у астраўлянаў і было тры ўдары ў створ) не зрабіў Фёдар Лапавухаў з мінскага «Дынама». У клубе ў гэтым сезоне ён асноўны брамнік – і не сказаць, што праз «падлімітны» ўзросту, таму што ў Вадзіма Скрыпчанкі на поле часцей за ўсё выходзіць яшчэ адзін «лімітчык». Зрэшты, напрыклад, у матчы 13 жніўня са «Славіяй» (2:2) кіпер якраз аднаасобна дазваляў «Дынама» ўпісацца ў рэгламент. У тым матчы Лапавухаў прапусціў двойчы, як і ў гульні да гэтага з «Іслаччу» (3:2), дзе прапусціў мяч, які чымсьці нагадвае трэці гол фарэрца Ёргена Нільсэна – але, мабыць, на закід Вадзіма Пігаса за каўнер Лапавухаву было зрэагаваць цяжэй.
У гэтым сезоне Лапавухаў даў падставу гаварыць пра сябе добрымі сэйвамі ў гульні з БАТЭ.
Але самым яркім эпізодам стаў негатыўны – з траўмай Алімардона Шукурава з «Нёмана», да якога дыскваліфікаваны за яе нанясенне Лапавухаў потым ездзіў з Мінска ў Гродна прасіць прабачэння.
Яшчэ адным стабільным «лімітчыкам» у «Дынама» зʼяўляецца Андрэй Рылач – якраз ён і закрыў вакансію ў гульні са «Славіяй», пакуль Лапавухаў сядзеў на лаўцы. Рылач – капітан моладзевай зборнай, з Фарэрамі гуляў на правым флангу абароны і пры першым голе прайграў «верх» усё таму ж Нільсену (зрэшты, гэта была не пазіцыя «дынамаўца», ды і Лапавухаў мог пайсці на выхад).
Да пераходу ў «Дынама» ў мінулае міжсезонне Рылач гуляў за «Энергетык-БДУ», дзе ў 2021-м паспеў падпісацца за Лукашэнку, а ў 2022-м дапамагчы камандзе ўзяць срэбра ЧБ (якое потым адабралі, хаця вынік матчу, які лічаць « несумленным» у выкананні «студэнтаў», ужо не мог апусціць іх ніжэй) і ўвайшоў у сусветны спіс «шматабяцальных гульцоў». Вось хто дакладна не будзе скардзіцца на нейтральныя палі – Рылач казаў, што ў адсутнасці заўзятараў для яго «праблемы няма ніякай». А яшчэ лічыў, што баснійскі «Жалезнічар» – звычайная каманда, якую па сілах прайсці «Дынама» у ЛК. Як аказалася, абаронца памыляўся.
Цэнтр абароны ў матчы з Фарэрамі займалі Максім Касараб і Глеб Якушэвіч. У эпізодах з галамі фарэрцаў Касараб не найлепшым чынам выбіраў пазіцыю, а Якушэвіч абавязаны быў выносіць мяч, калі замест гэтага прапусціў пас на другое ўзяцце варот. У самым канцы матчу на вуглавым Глеб заштурхаў мяч і ў чужую браму, але гэтага было недастаткова. Абодва абаронцы гулялі і ў Андоры, калі ў вароты Лапавухава заляцеў толькі адзін мяч.
Касараб і Якушэвіч – стабільна асноўныя ў складзе «Мінска», дзе практычна ўся каманда складаецца з «лімітчыкаў». З абаронай у «гараджанаў» не так дрэнна – за 18 матчаў ЧБ прапушчана толькі 17 мячоў (тры з іх – у апошнім туры ад «Нёмана»). Якушэвіч нават быў уключаны Карласам Алосам у пашыраны спіс першай зборнай Беларусі, але ў выніку паехаў да моладзі. Касараб у 2021-м праходзіў прагляд у маскоўскім «Лакаматыве», але яго не падпісалі, а 2022-і выпаў праз праблемы са спінай, якія да канца так і не былі вырашаныя.
На левым флангу абароны гуляў і быў праціснуты пры першым голе фарэрцаў Ілля Маскаленчык, які з сакавіка 2022-га ўваходзіць у сістэму расійскага «Зеніта», гуляючы за «Зеніт-2». Цяпер каманда выступае ў Д4 – але расійскую сістэму ніжэйшых ліг рэфармуюць, і таму «Зеніту-2» дастаткова выйграць восеньскі аднакругавы турнір у сваёй зоне, каб ужо ўвесну патрапіць у Д3. Пакуль у піцерцаў атрымліваецца добра – пасля 7 з 17 матчаў яны лідаруюць з 19 пунктамі. Маскаленчык згуляў за каманду ў пяці сустрэчах, у чатырох з якіх вароты заставаліся «сухімі». Пра сваё знаходжанне ў расійскім Д4 гулец «ні кроплі не шкадуе», таму што лічыць, што працуе «з вялікімі людзьмі, якія шмат чаго даюць».
Да чатырох абаронцаў у матчы з Фарэрамі Ясінскі дадаў двух фармальна апорнікаў, якія больш вядомыя як гульцы, скіраваныя на атаку. Кірыл Зіновіч, які атрымліваў ад трэнера пахвалу ў красавіку, быў заменены пасля другога гола супернікаў. Гэты футбаліст таксама гуляе ў Д4 – туды ў мінулым сезоне вылецела другая каманда партугальскай «Віторыі» Гімараэш. У новым сезоне лягчэй не стала – пачалі з двух паражэнняў. Потым Зіновіч зʼехаў у зборную, а яго каманда ўсё ж такі набрала першыя тры пункты дзякуючы хет-трыку чэмпіёна Беларусі Дэніша Дуартэ.
Месца яшчэ аднаго апорніка займаў цяпер «дагестанскі брат» Лісаковіч, Руслан, які ўжо на 26-й хвіліне зарабіў жоўтую картку, што для гульца гэтай пазіцыі заўсёды дрэнна. Замянілі яго толькі на 63-й хвіліне пры ліку 0:3. У расійскім Д2 за «Дынама» з Махачкалы футбаліст у гэтым сезоне таксама не адзначаўся рэзультатыўнымі дзеяннямі, але хаця б ужо мае практыку – а то без яе Ясінскі не пускаў гуляць з Андорай.
У першыя паўгода ў Дагестане было дрэнна і з гульнявым часам, хоць Руслан відавочна сканцэнтраваўся на гульні – нават закінуў улюблёны TikTok, дзе апошнія відэа датуюцца канцом студзеня (там Лісаковіч спрабаваў розныя «маскі»). Зрэшты, зусім без кантэнту беларускі зборнік далёка ад Радзімы не застаўся – паспеў зрабіць здымак з папулярным у Расіі блогерам.
Астатнія гульцы першапачаткова выходзілі ў атаку, але таксама ўсе паспелі дагуляць да ліку 0:3 – гэта Ілля Чарняк (пасля «Шахцёра» не замацаваўся ў РПЛ і зʼехаў у казахстанскі «Каспій»), Уладзіслаў Ложкін (пра тое, чаму падпісант за рэжым зʼехаў з Беларусі малаціць галы ў Д2 Казахстана, у нас нядаўна выходзіў вось гэты тэкст), Ягор Карпіцкі (усё яшчэ найлепшы бамбардзір ЧБ-2023, гульнявы час якога ў «Крылах Саветаў» пакуль што нестабільны) і Герман Баркоўскі (праводзіць сезон у «Энергетыку- БДУ», апошнія матчы не прапускаў, але абыходзіўся без выніковых дзеянняў, з якімі праблемы ў каманды ў цэлым).
Зрэшты, адзначым, што Чарняк зрабіў навес з кутняга, які прывёў да позняга гола Якушэвіча. Яшчэ адзін асіст аддаў Арцём Шуманскі (пры ліку 0:2 замяніў Зіновіча), які за рэдкія выхады ў складзе кіпрскага «Арыса» паспеў двойчы вызначыцца. Ну а Цімафей Мартынаў і Данііл Душэўскі з «Мінска» (на дваіх забілі восем з 14 клубных мячоў у ЧБ), Максім Кавалевіч з «Шахцёра» (адзін з некалькіх пастаянных «лімітчыкаў» у складзе Аляксея Багі) і Глеб Роўда (гулец абоймы « Іслачы» – «лімітную» вакансію і без яго ёсць кім закрываць) наогул могуць занесці матч з Фарэрамі сабе ў актыў – усе зʼявіліся ўжо пры ліку 0:3, а Роўда яшчэ і забіў.
